Promé cu su extradicion….Sranang Hulandes a huy fo’i prison na Paramaribo

PARAMARIBO – Un homber di nacionalidad Hulandes, pero di origen Surinameño a huy fo’i prison den Duisburglaan na Paramaribo e siman aki algun dia cu autoridadnan tabata cla pa extradité pa Hulanda.

E fuga a tuma lugar diadomingo y autoridadnan hudicial na Paramaribo ta furioso.

Faltando poco dia pa nan entregá e fugitivo Gerel Lusiano Palm na autoridadnan Hulandes caminda nan ta buské pa intento di asesinato y pocesion ilegal di arma Palm (34) a logra huy.

 

Gerel L. Palm t’e sospechoso principal den un caso di tiroteo cu a tuma lugar riba un diasabra nochi den e pueblo Noordeloos den sur di Hulanda dia 10 di  decèmber aña pasá.

Un automobilista cu a pasa riba caretera a yama Polis pa bisa cu el a mira un homber drumi cant’i caminda y poco mas leu un otro homber. Ambos tabata di Rotterdam.

Nan tabatin herida di bala y a hiba nan hospital.

 

E siguiente dia e victima di 35 aña a sali for di hospital, pero Polis a arest’é, pasobra tin indicacion cu e tabata envolvi den e tiramento.

E investigacion a concentrá riba Gerel Lusiano Palm, kende a retorná Sürnam y husticia Hulandes a pidi pa arest’é.

Dia promé di maart a arest’é y segun e informe oficial a sake fo’i su cèl pa topa su abogado y na caminda el a pidi pa papia cu e oficial di warda.

 

Unabes den e oficina el a saca un arma di candela for di bou di su mesa y a kita e arma di e oficial y a cana sali for di prison.

Minister di Husticia Jennifer van Dijk-Silos a anunciá cu lo tene un investigacion profundo y a garantisá cu esnan culpabel lo haña castigo pisá pa nan complicidad cu e fugitivo.

Leave a Reply

Top