Prome fase di Happy Flow ta den funcion, “E proyecto ta mas cu infrastructura, e ta inovativo y parti di e mundo digital”, di acuerdo cu Minister Richard Arends

Den un ambiente festivo a celebra cu e prome fase di Happy Flow a start. N’e ocasion aki varios persona di e comision di enfoke, lidera pa Aruba, tabata presente, entre nan CEO di Schiphol y ehecutivonan di KLM y Aeropuerto di Aruba.

Aruba t’e prome pais na mundo unda a crea un trayectorio cu ta na disposicion di e pasahero pa medio di automatisacion.

Un bes mas Aruba ta marca pauta y paisnan grandi cu aeropuertonan mucho mas espacioso cu Aruba no a logra loke e isla chikito aki a logra.

Algo cu nos por ta mas cu orguyoso di dje.

 

Minister di Asunto Economico y Comunicacion, Richard Arends tabata entre e oradornan. El a splica con esaki a inicia.

“Algun aña atras Prome Minister Eman y ami a bay Hulanda y nos a haya un tour den Schiphol. Eynan nos a topa cu e compania Portugues ‘Vision Box’ cu tabata instalando algun machin cu lo bira e gateway nobo di Europa pa Hulanda y vice versa.

Tabata algo masha inovativo. Asina cu nos a regresa Aruba nos a cuminsa move y sera contactonan pa percura pa Aruba tambe haya un Happy Flow, conforme e pre-clearance cu nos tin cu Merca unda un registracion similar di pasahero ta tuma lugar.

Tur esaki na beneficio di e pasahero y Aruba kier un pre-clearance pa Europa asina tambe.” Pa logra esaki e Happy Flow ta un prome paso.

 

Arends a bisa cu awor cu e proyecto ta cla y den funcion esaki ta duna un sentimento di orguyo y satisfaccion.

“Sigur si tene na cuenta cu algo cu nos a wak na Schiphol varios aña pasa, ta na Aruba y den funcion.

Mi ta masha orguyoso di loke nos a logra pa e isla chikito aki Aruba. Mi kier enfatisa cu e proyecto aki no ta simplemente infrastructura. E ta algo inovativo y parti di e mundo digital.” Minister Richard Arends a bisa cu tur loke ta inovativo y parti di e mundo digital, ta bon pa nos economia.

 

E proyecto aki riba dje ta haci e biahe di e pasahero mas placentero, liher y eficiente. Loke ta importante ta tambe cu e proyecto aki ta sirbi como un ‘showcase’. Tur wowo ta un bes mas riba Aruba.

“Esaki t’e forma con nos a posiciona Aruba durante e ultimo añanan. Nos a mustra cu Aruba tin hopi potencial pa explora conocimento riba diferente tereno.”

“Mi ta kere cu un proyecto manera Happy Flow, aki na Aruba ta eleva nos isla y ta haci’e mas visibel den mundo di aeropuertonan y nan desaroyo.

E proyecto aki no solamente ta sirbi economia di Aruba riba un ‘micro level’, pero tambe ta pas perfectamente den e macro policies di Gabinete Mike Eman, di cual mi ta masha orguyoso di ta forma parti di dje.”

Richard Arends a gradici tur e partnernan envolvi cu a logra e prome fase di e tremendo proyecto Happy Flow pa Aruba.

 

Leave a Reply

Top