Prome Minister a cana den San Miguel Habitantenan contento cu e avancenan den nan bario y tambe pa Aruba henter bou liderazgo di Prome Minister Eman

Diahuebs mainta ultimo, Prome Minister Mike Eman a bishita bario di San Miguel. Hunto cu ciudadanonan di e bario, Prome Minister y su team a combersa cu bisiñanan, pero tambe a tuma tempo pa tende nan preocupacion, sugerencia y ideanan pa mehoracion di nan bario y tambe Aruba en general.

 

San Miguel ta un bario caminda tin hopi cas, pero e infrastructura pa hopi aña a keda sin wordo traha riba dje.

Prome Minister a duna un splicacion na bisiñanan loke ta trahando riba dje p’e bario en particular.

Maria Isabel Arboleda a keda contento di por a combersa cu sr. Eman riba e bario.

“E tabata un sorpresa hopi grandi y bunita, pasobra e ta haciendo hopi trabou di mehoracion. E kier pone luz y drecha e caminda. Pues bon noticia y bon trabou pa nos comunidad mientras cu bishita na casnan ta algo hopi great,” el a comenta.

 

E ciudadano a expresa tambe di ta hopi gradici na Prome Minister Mike Eman, pasobra Aruba aworaki tin masha hopi lugar bunita pa muchanan (parkenan), careteranan moderno y un bunita centro di ciudad.

“Nos por mira cu Aruba a crece masha hopi mes, e isla ta mas bunita. P’e aña ’ki sra. Arboleda ta sigui kere cu lo bin cosnan grandi y bunita pa Aruba.

“E Prome Minister tin hopi bon idea pa mucha y hende grandi. Tur loke cu e pensa ta pa Aruba sigui crece.”

 

Den e bario tambe Prome Minister a topa cu sra. Violeta Figaroa, mama di e bon conoci ex-basebolista di Major League, Sidney Ponson.

“Nos a prepara pa duna nos Prome Minister un bon bini,” sra. Figaroa a cuminsa pa splica despues di a combersa cu sr. Eman riba su bario y Aruba en general.

Un di e preocupacionnan di sra. Figaroa ta relaciona cu e trafico cu ta sali riba e caminda grandi. El a gradici e Prome Minister relaciona cu e noticia cu porfin iluminacion ta yega den nan bario.

 

Sra. Figaroa a señala tambe, durante e bishita, cu e Gobierno aki, guia pa Prome Minister Mike Eman, a haci hopi proyecto pa Aruba.

“Nan a haci hopi trabou y falta algun mas. Mira solamente e caminda bayendo pa San Nicolas con e ta wordo drecha, cambiando e caminda pa uno di 4 via”.

Sra. Figaroa a mustra riba e Linear Park cu ta wordo uza dor di hopi hende mes pa tene nan curpa den condicion saludabel.

Pesey nos deseo ta p’e Gobierno por sigui y caba cu e trabounan pendiente,” sra. Figaroa a duna di conoce.

 

Top