Prome Minister a reuni cu Banco di Inversion nobo di Hulanda

Siman pasa Prome Minister Mike Eman hunto cu Cedric Tilma, representante di Aruba na Brussels, a reuni cu Peter Martens Directeur beleid & externe relaties, Nederlands Investerings Agentschap.

 

Segun Tilma a splica, NIA ta un instancia masha importante, ya cu e ta un di e agencianan cu ta bay canalisa placa di “European Fund For Strategic Investment”. E fondo aki tin un suma di 2.5 biyon euro na su disposicion. E mester busca proyectonan cu ta cuadra cu e exigencianan di e fondo pa inverti den nan.

 

Den e reunion, cu Tilma a bisa di tabata hopi positivo, a bini dilanti cu e fondo aki ta bay bira Banco di Inversion Nacional di Hulanda, similar na loke tabata Nationale Investerings Bank (NIB)

“Nos ta sondeando e posibilidadnan pa mira con e fondonan cu ta bay tin den e Banco di Inversion di Hulanda por wordo aplica tambe na e parti Caribense di Reino. Si di otro banda por logra pa un filial di e banco di inversion aki establece su mes na Aruba, ta algo tremendo.

Nos ta spera cu tempo nos por logra esaki, ya cu e ta parti di e combersacionnan cu nos a hiba.

E ta otro muestra di e confiansa cu e instancianan financiero na Hulanda tin pa traha y coopera cu Aruba. Nos ta spera cu e mandato cu e banco di inversion nobo aki tin ta cubri e areanan di Caribe”, segun Tilma.

 

Lo ta interesante, segun Tilma a splica, pasobra na Aruba e companianan lo haya acceso na e fondonan aki. Prome Minister Eman tabata di bishita na Hulanda, unda no solamente el a atende celebracion di Dia Nacional di Aruba, pero tabatin un agenda hopi ocupa cu reunionnan cu diferente instancia manera e. o. e banco ariba menciona, ArubaHuis, ATA-Europe, KLM gobernante y lidernan politico.

 

Por bisa cu e tabata un biahe fructifero cu logronan grandi, manera destinacion pa e ultimo placa cu tin den Fondo di Desaroyo Arubano cu ta rond di 16 miyon florin, di cual un parti ta destina pa drecha y construi careteranan na Aruba.

Top