Prome Minister Eman a bishita Departamento di Cultura A papia di nos herencia cultural y varios otro punto importante

Prome Minister Mike Eman a bishita Departamento di Cultura unda el a wordo ricibi dor di Director Dumfries, sub-Directora sra. Thiel y sr. Robert Maduro.

For di dia cu cultura ta resorta bou Prome Minister Eman, e ta trahando duro pa yuda engrandece cultura di Aruba den tur forma posibel.

Despues di a sera conoci cu cada empleado a sigui un reunion cu gerente di DCA.

 

Prome cu esey Robert Maduro a tuma su guitara y a toca e pieza di propio suelo: ‘Nos a sali paranda’ p’asina trece un dushi ambiente.

Den e reunion cu a sigui gerente di DCA a papia cu Prome Minister Eman pa spik’e tur loke nan a haci caba y kico nan kier mira cambia y mehora.

Prome Minister Mike Eman a scucha cu hopi atencion loke sr. Dumfries y sra. Thiel a trece padilanti y a conta nan di su plannan.

 

Director di Departamento di Cultura Aruba, drs. Siegfried Dumfries a guia Prome Minister Eman durante su bishita n’e departamento.

Prome Minister, kende ta encarga awor cu Cultura, den un reunion cu gerente di DCA a discuti varios punto interesante.

Na 2014 tabatin un cumbre nacional di cultura unda a identifica 12 punto di cual algun tabatin prioridad.

Nan ta formacion, informacion y educacion den diferente disciplina di arte. Documentacion y Digitalisacion di herencia cultural; Calendario Nacional Cultural y Financiamento di proyectonan cultural.

 

Tambe a papia di otro puntonan di atencion e.o. infrastructura tecnico y desaroyo di personal.

Despues di e reunion Dumfries tabata masha satisfecho.

“E reunion a bay den un ambiente masha amical y hopi importante ta cu Minister a scucha nos cu atencion.

Nos a papia di e cumbre di 2014 unda nos a redefini nos maneho.”

Loke ta hopi importante ta duna atencion n’e herencia cultural di Aruba, asina Dumfries a splica.

“Importante ta pa nos investiga y documenta nos herencia cultural. Fiestanan nacional tambe ta hayando nan debido atencion dor di nos departamento y aunke tin un comision encarga cu e fiestanan aki, nan ta resorta bou DCA.

 

Loke ta bon tambe di e encuentro cu Prome Minister Eman ta cu nos a crea e base, e plataforma y structura pa sigui traha hunto tanto cu Ministerio como tambe otro instancianan cultural. Hunto nos por ehecuta plannan grandi.”
Sra. Thiel a bisa cu e reunion a resulta den un combersacion hopi interesante. “Nos por a splica di e tres proyectonan grandi cu nos tin pa ehecuta e aña aki.

Tambe nos a papia riba e plannan cu nos ta trahando riba nan pa futuro. Tur e interes y plannan cu Prome Minister Eman mes tambe tin a wordo treci dilanti.

El a pidi nos pa pensa riba nan y asina nos a intercambia riba varios tema. Nos ta mira cu nos ta bay tin bon cooperacion cu otro den futuro.”

Top