Prome Minister Eman a ricibi bishita di Delegacion Proyecto Nuevo Mundo hunto cu Clyde Harms

Un orkesta sinfonico di hobennan Arubiano cu ta haya les gratis di musica y un biaha pa aña ta duna un concierto.

E soño aki di e.o. Clyde Harms ta bira realidad. Esaki ta loke a keda presenta recientemente na Prome Minister Mike Eman, durante un bishita cu un delegacion di Venezuela, a compaña pa Harms.

 

Prome Minister Eman tabata hopi entusiasma cu e idea aki, pasobra ta algo cu sigur lo yuda hobennan di Aruba desaroya nan talentonan musical.

Despues di vacacion di zomer e hobennan musical por acudi serca e orkesta hubenil di Nuevo Mundo Foundation (NMF).

E organisacion Arubano aki a surgi di e colaboracion cu e organisacion Venezolano Nuevo Mundo Festival & Academy.

Na 2015 nan a organisa pa prome biaha un siman musical pa hobennan. A haci uzo di docentenan, di cual algun a bin di Venezuela.

Hobennan cu ta toca un instrumento musical por a sigui les serca un di e maestronan di clase.

 

Na final di e siman a forma un orkesta y e participantenan a duna un presentacion. Mientras tanto, tin e di tres edicion di e festival aki den preparacion p’e temporada di zomer.

Orkesta Sinfonico Arubano pa hobennan ta bira un version permanente di e siman musical aki.

Segun Harms a splica, nan ta traha hunto cu Scol di Musica RufoWever y nan tin contracto tambe cu e Naschoolse Opvang.

Prome Minister Eman a keda impresiona.  Tipo di programanan aki ta loke e ta desea pa bay den bario tambe ya cu e lo yuda hobennan desaroya nan talentonan.

Top