Prome Minister Eman masha satisfecho cu partnership entre Universidad Aruba cu KU Leuven

Universidad di Aruba a firma un acuerdo di partnership cu Katholieke Universiteit di Leuven  pa creacion di un Green Faculty. Esaki a tuma lugar den aula di Universidad di Aruba den presencia di Rector di UA dr. Glenn Thode, prof. dr. Danny Pieters di KU Leuven, mr. drs. Cedrick Tilma, representante di Aruba na Union Europeo, Bianca Peters di Bureau Innovatie, kende a ‘host’ e evento, e mihor graduado di VWO e hoben studiante Tapia, docentenan di UA, demas representante di KU Leuven y invitadonan.

Prome Minister Eman a hiba un bunita discurso n’e ocasion aki.

 

Bianca Peters a anuncia Prome Minister Eman den un forma hopi elocuente. El a splica cu tur dia di nobo ta siña algo di e persona aki cu no ta solamente un gran visionario, pero sin duda un hende cu ta dedica su bida cu pasion, energia y amor na su isla y su hendenan.

“E momento aki ta berdaderamente uno special”, Eman a bisa. El a amplia con Aruba a wak algun aña pasa bek riba su modelo socio economico cu a trece hopi prosperidad.

Den e ultimo 25 añanan Aruba su turismo a crece grandemente.

Di 200 mil turista, e cantidad aki a surpasa un miyon turista cu ta yega cu avion y riba un miyon cu ta bin via crucero.”

 

Eman a splica cu si antes Aruba tabatin 2 mil kamber di hotel, e cantidad aki ta 10 mil awendia. E desaroyo na Aruba ta enorme.

“Nos a wak bek riba mas cu esey. Nos a mira nos sistema Constiticional cambia, mescos tambe nos relacion cu Reino. Hopi di esaki a determina nos calidad di bida y nos oportunidadnan pa loke ta futuro di Aruba.

Nos tin cu puntra nos mes awor cu si nos kier mira mas crecemento den turismo. Dor di expande nos capacidadnan construyendo mas hotel? Esaki ta loke nos kier p’e futuro di Aruba?

 

Esaki ta un di e preguntanan mas fundamental cu nos a haci nos mes algun aña pasa. E beneficionan di Reino pa nos isla ta sostenibel? Haciendo uso di e mesun Statuut di 1954? Nos a contesta e preguntanan aki cu podise mas pregunta y algun contesta.”

Elaborando riba e modelo socio economico, e pregunta ta surgi e ora kico ta haci esaki sostenibel.

Kico lo haci Reino manera e ta awe sostenibel. Eman a bisa cu mirando e relacion cu Hulanda tin cu e islanan esaki no semper ta mustra di ta constructivo.

“Asina mes nos a mira cu tin base pa continua cu e relacion aki. Nos a pensa cu podise nos mester cambia e sistema Constitucional, pero e motibonan pakico nos kier continua cu Reino y unda nos ta mira un beneficio entre e islanan Caribense y Reino. Esaki no ta un modelo bieu basa riba colonisacion di 200 aña pasa?

 

Of tin un otro motibo pakico nos mester sigui cu e relacion aki? Nos a brasa e reto pa haya e motibo nobo aki. E motibo nobo aki ta cu nos por basa nos relacion riba oportunidadnan win-win.”

Eman a splica cu ta pesey cu firmamento cu un partner di estatura di KU Leuven ta yen’e cu un enorme satisfaccion, pasobra ta un iniciativa importante cu a keda logra pa Universidad di Aruba.

“Pero e logro aki ta grandi tambe p’e relacion cu Reino cu nos por mustra cu tin un oportunidad win-win den e relacion entre Caribe y Union Europeo y e miembronan di estado di UE. Nos por showcase e beneficionan.

Kico t’e beneficionan pa KU Leuven bin for di Belgica te aki n’e isla chikito Aruba y crea un partnership? E ta e bentana pa Latino America.

E ta e oportunidad cu ta wordo brinda di un posicion geografico of un circumstancia climatologico special. Nan ta aki dor di e oportunidad pa hiba avance den tecnologia, e oportunidad pa crece como un universidad y tambe riba otro mercado.

 

Top