Prome Minister Eman orguyoso y satisfecho cu apertura di Qredits den MFA Noord

Diamars ultimo Qredits a establece su mes oficialmente na Aruba. Un bon desaroyo cu sin duda ta yuda economia di e isla.

Prome Minister Mike Eman, kende a traha duro pa logra haya e instituto Qredits na Aruba, a tene un discurso prome cu e apertura oficial a tuma lugar den edificio di MFA na Noord.

 

Den su discurso Eman a pone enfasis un bes mas riba un bon relacion den Reino y con e balor di Reino a percura pa amistadnan, e.o. cu Director di Ondernemend Nederland, Hans Biesheuvel, kende a bin Aruba pa inauguracion di Qredits, pero tambe pa logra otro proyectonan.

 

“E base pa Qredits bin Aruba a wordo poni cu un mision comercial na Brazil bou guia di e tempo ey Principe Heredero Willem Alexander. Eynan sr. Biesheuvel y ami a papia hopi di e posibilidadnan win-win di loke nos islanan por brinda na e parti Europeo di Reino y vice versa.”

Mike Eman a conta cu nan a bay en busca di e concepto win-win aki y a traha riba dje cu e meta pa realisa cosnan grandi.

Hunto a yega n’e conclusion cu nan tin un lista largo di actividad y iniciativanan cu nan mester desaroya y awe, cu apertura di Qredits por kita un di e iniciativanan di riba e lista.

 

“Pa loke ta Qredits mi a aserca Minister di Asunto Economico di e tempo ey Mike de Meza, tambe Minister di Enseñansa, Michelle Hooyboer-Winklaar y nos a apunta Richard Arends kende tabata traha como consehero pa trek e proyecto aki y su sucesor Philipe LaReine a sigui cu e trabou.

Sin nan esfuersonan grandi e proyecto aki no por a keda cla.”

 

Mike Eman a felicita sr. Oliver Vieira, kende a bira e manager di Qredits na Aruba, tambe Camara di Comercio cu tabata un di e prome stakeholdernan di e iniciativa bunita aki.

“Prome Qredits a bin establece su mes na Aruba, nan a papia cu nos y cu Kamer y Bureau Innovatie. Tur hende a duna nan sosten y cooperacion, e resultado ta cu Qredits a yega Aruba.

Eman ta contento cu e relacion cu Aruba tin cu Reino.

 

“Si nos sigui aserca Reino den forma constructivo, bay en busca di partnernan cu tin e mesun idea di Reino cu nos tin y nos ta traha hunto, anto nos por bin cu bunita productonan, di cual Qredits sigur ta un ehempel excepcional di esaki.”

Qredits ta un fundacion non profit cu ta otorga micro financiamento te cu 50 mil florin na un interes di 8,75% y ta coach entrepreneurs durante inicio di nan negoshi.

Loke ta diferencia Qredits di e demas institucionnan financiero ta cu e instancia aki no ta pidi borg p’e fianza.

 

Aprobacion di e fianza ta basa primordialmente riba e plan di negoshi cu ta wordo presenta, como tambe e habitonan y motivacion di e empresario.

 

Top