Prome Minister Eman ta traha duro y ta cumpli

Clayton Croes, hefe di Gele Koorts Muskietenbestrijding, un hoben profesional di Paradera, a haya e honor pa cende e prome luz LED den e parti di Nuñe cu tabata den scuridad.

Esaki a sosode net banda di Nuñe 10-F, cas di famia Tromp. Habitantenan y famia a reuni cu un alegria grandi pa e ocasion special aki diahuebs anochi hunto cu Prome Minister Mike Eman, team BoBario encarga cu e programa Luz den Bario y funcionarionan di ELMAR.

“Mi ta hopi, pero hopi contento. Prome Minister Eman a cumpli cu su promesa di trece luz den nos bario”, Wendy Tromp a expresa.

 

Gabinete Mike Eman II hunto cu ELMAR a scoge pa introduci luz LED pa cayanan na Aruba, segun e vision di un maneho sostenibel pa pais Aruba.

Ademas cu luz LED ta hopi eficiente den consumo di energia, permitiendo pa pone mas punto di luz rond Aruba, e iluminacion mes cu e ta brinda ta hopi mas cu e luznan bieu.

Un bombiyo di 20 pa 30 watt ta duna iluminacion di 80 watt di luznan convencional.

Esaki ta haci cu awendia cada pasa un poste di coriente ta pone luz ta manda iluminacion pa practicamente tres cas. Esaki tabata bon visibel na Nuñe na momento cu Clayton Croes a cende e prome luz den e parti di e bario ey.

 

“Nos a biba hopi aña den scuridad y un dia mi a dicidi cu mi no por cu e scuridad aki mas y a cuminsa cana mi caminda. Mi a papia cu Prome Minister Eman y el a scuchami.

Danki na dj’e awe nos a haya luz”, Gwendeline Tromp a bisa. Famia y bisiñanan tur tabatin elogio pa Prome Minister Mike Eman, no solamente pa e hecho cu e ta scucha ciudadanonan y ta trata di yuda nan cu nan peticionnan, pero tambe pa loke su Gobierno a haci pa Aruba.

“Mike a haci un bon trabou, mi ta pidi Dios pa e sigui cu esey y pa hopi aña mas”, sra. Van der Biezen a bisa.

 

El a comenta cu esnan cu ta bisa cu ponemento di luz ta coi loco no tin e sentimento di habitantenan na pecho.

“Luz ta nos siguridad. Nos por yega cas anochi trankil. Pero tambe e ta yuda nos baha consumo di coriente, pasobra nos no mester laga luznan cendi anochi. Nos por para den cura combersa cu bisiñanan, e muchanan por core nan bicicleta anochi trankil”, ta algun di e puntonan cu el a menciona di e beneficionan cu luz ta trece pa e bario.

 

Despues cu e prome luz a wordo cendi diahuebs anochi ta sigui cu instalacion di e puntonan nobo den henter e area cu ta keda patras di e caminda principal di Nuñe y despues ta sigui cu instalacion riba e caminda principal di Paradera pa Nuñe cu ta hopi uza pa automobilistanan.

Na final di e ceremonia Eman a ricibi hopi brasa y sunchi di e habitantenan pa cumpli cu un otro bario mas.

 

Top