Prome Minister Mike Eman a bishita hobennan di SVT hungando Beach Rugby

Hobennan di Formacion Social (SVT) a haya un chens pa participa den un evento di Beach Rugby cu a tuma lugar riba e beach entre Divi Divi y Tamarijn.

Esaki tabata un iniciativa di e organisacion Aruba Rugby cu tin e deseo pa haci e deporte aki popular na Aruba.

 

E idea a bin di Firozh Moeharram, Presidente di Aruba Rugby Union, kende ta un amante di e deporte aki y a dicidi di introduci esaki riba e isla di na Aruba.

E ta na Aruba pa realisa algun trabou. Mirando e beachnan bunita, el a pensa cu e ta un bon area pa introduci Beach Rugby y cu esaki ta un deporte ideal pa hobennan Arubiano.

Asina den contacto cu Nicole Hoevertsz a sugeri pa hobennan di Formacion Social siña y practica e deporte di Beach Rugby, lantando nan propio team.

 

E tabata un idea cu a wordo tuma man habri, mirando cu e ta un actividad di disciplina y unda cu e hobennan por pone tur nan energia den dje.

Prome Minister Mike Eman a aplaudi e iniciativa, no solamente pa envolvi e hobennan di SVT, pero tambe pa introduci e deporte aki pa hobennan haya mas actividad sano pa participa den dje.

 

“Hopi biaha ta wordo bisa cu no tin tereno pa practica deporte, pero Aruba tin asina hopi beach unda cu por practica beach tenis, beach volleyball y awor hasta beach rugby.

E ta algo cu sigur nos ta apoya, ya cu e ta crea un forma pa nos hobennan mantene nan mes ocupa den forma sano,” Prome Minister Eman a expresa.

E grupo di SVT a ricibi un certificado for di man di Prome Minister Eman cu pa nan participacion den e competencia di Beach Rugby.

 

Esnan interesa den e deporte aki, por subi e pagina di facebook Aruba Rugby y riba cual por haya tur informacion di con pa tuma contacto cu e organisacion, cu ya caba ta afilia na otro organisacionnan mundial di e deporte aki.

Top