Prome Minister Mike Eman a presencia Momento cu charla riba Monumentonan a wordo introduci na scol basico

Diarazon mainta Prome Minister Mike Eman, encarga cu Asuntonan di Monumento tambe, a presencia e momento cu un charla riba Monumentonan a bay scol pa prome biaha. Esaki ta forma parti di un Proyecto di Oficina di Monumento cu ta hiba e historia di Monumentonan di Aruba na scolnan primario.

 

Prome Minister Eman a expresa di ta hopi entusiasma cu e proyecto aki, ya cu di e forma aki, e studiantenan, cuminsando cu e scolnan basico, ta bay dispone di e informacion basico di historia di Monumentonan na Aruba.

“Mi ta hopi contento cu Oficina di Monumento a tuma e momento aki  – celebracion Dia Nacional di Aruba – , pa cuminsa un programa cu ta bay na tur scol basico, dunando informacion riba nos Monumentonan.

Hustamente den e siman cu nos ta celebra nos Dia Nacional, e Monumentonan ta recuerdonan importante di e identidad, historia y cultura di nos pais, cu ta identifica loke tabata nos estilo di bida,” Prome Minister Eman.

 

E prome charla a wordo duna na studiantenan di 4de, 5de y 6de klas di Reina Beatrix School, cu su edificio ta uno Monumental y ta den proceso di wordo renoba. Awor nan ta ubica na Seroe Blanco.

E charla a wordo presenta pa un team di Oficina di Monumento lidera pa Daphne Every, kende a duna e hobennan un splicacion di historia di cas y edificionan na Aruba y nificacion di diseñonan cu ta wordo uza antes.

 

Asina a bini dilanti p.e. un splicacion di kico ta un hadrei y fogon di un cas di antes. Pero tambe a papia di e forno di kalki y pakico ta importante mantene un Monumento manera un Kalkoven.

Esaki ta importante, Prome Minister Eman a bisa, pasobra nan ta parti di historia y creatividad di nos hendenan.

T’e motibonan aki a motiva e Gobiernonan cu el a lidera pa den e ultimo añanan apoya restauracion di edificionan Monumental y a wordo cataloga dor di Oficina di Monumento como tal.

 

Den cuadro di esaki e mandatario a expresa di ta hopi contento cu denter di algun dia ta bay inaugura Plaza Padu cu ta keda den e Centro di Edificionan Historico, manera Museo Arkeologico, edificio di Algemene Rekenkamer, Censo, Willem III Toren, Cas di Hart y Bestuurskantoor.

Tur e edificionan aki ta keda rond di Plaza Padu.

“E ta coronacion di un obra di e rescate y restauracion di Centro di Ciudad cu a tuma lugar durante e ultimo añanan cu hopi perseverancia , bou guia di Oficina di Monumento y Fondo di Monumento,”e mandatario a duna di conoce.

E programa aki di Oficina di Monumento lo pasa na tur scol basico di Aruba y tin un duracion di un aña y mey.

Top