Prome Minister Mike Eman : Ademas di Sector Primario, tambe tin lugar den Caya Grandi pa expone nos Cultura

Despues di a tene Mercado Popular di Santa Rosa den Caya Grandi pa prome biaha diasabra ultimo, Minister President Mike Eman ta kere firmemente, cu tin espacio tambe pa expone nos artistanan local den nan diferente disciplina.

“Ora cu Ministerio di Sector Primario a cay hunto cu esun di Asunto General, di biaha nos a bay over na pensa con por acopla e diferente metanan cu tin pa desaroya na Aruba.

Asina tur instancia por duna un empuhe na adelanto di nos pais,” asina e prome mandatario a duna di conoce. Cu esaki ta referi tambe na sector cultural.

 

Den fin di siman cu Caya G.F. Betico Croes a tene su evento di ‘T’Aki Tin’, un talento local a sa di deleita e publico grandi cu a bishita centro di ciudad pa haci compras. Ta trata di e hoben musico Serghio Jansen.

Mescos cu e standnan cu productonan local n’e mercado di Santa Rosa, tur hende ta puntra si esaki ta iniciativanan cu ta bay continua, Premier Eman a comenta.

 

E contesta ta un ‘Si.’ E intencion ta pa nos haci esaki un biaha pa luna. Mientrastanto, durante luna di december, tur fin di siman lo tin actividad den caya y hunto cune tambe e oportunidad pa producto y talento di nos hendenan por briya.

“Pa nos centro di ciudad por competi, e mester ofrece algo unico. E aspecto unico cu nos por ofrece ta e ambiente local.

Ora cu tin hopi hende, automaticamente turista tambe ta bin y hopi biaha nan ta busca e ambiente local,” t’e pensamento di Premier Eman.

 

E prome mandatario di nos pais ta splica cu e plazanan den Caya Grandi y Centro di Ciudad, mescos cu rond di Aruba a wordo crea hustamente cu e pensamento pa trece hendenan hunto. Actualmente Premier Eman ta trahando cu e departamentonan concerni pa hinca un bon programa den otro.

Top