Prome Minister Mike Eman: Aruba tin hopi motibo pa celebra logronan historico y cultural

Maart ta un luna caminda nos ta reflexiona hopi riba nos identidad cultural y nos historia, pasobra nos tin hopi pa ta orguyoso di dje.

Mescos cu den pasado, awendia Aruba tambe tin hopi logro pa celebra.

Pa tal motibo, Minister President, Mike Eman a haci e siman aki un yamada nacional na nos ciudadanonan pa ban cuminsa celebra for di awe caba.

 

“Ban celebra nos dia nacional; ban celebra nos stimacion pa nos isla; ban celebra nos compromiso pa futuro di nos pais; ban celebra e renobacion di nos barionan, di nos centro di ciudad; tur trabou grandi cu nos a haci hunto cu nos pueblo.”

Durante di dos mitar di siglo 20, 18 di maart t’e fecha cu a celebra e manera con Aruba a demostra na mundo henter su deseo, pero tambe e capacidad pa ta ‘baas den nos mes cas’.

 

Na momento cu nos grandinan a vocifera e sentimento ey, hopi no por a pensa cu un isla chikito por a duna contenido y realce na un status caminda lo tin asina hopi responsabilidad pa carga. Sinembargo, tur dia a proba hustamente esey cu crecemento di pais Aruba y cu e desaroyo positivo di pais Aruba.

Awe na 2017, esaki t’e caso ainda. Minister President Eman a splica cu recientemente nos isla a haya bishita di mandatarionan Hulandes cu kendenan no semper ta topa cu nan, pero un pa un a bin Aruba y cada un a duna reconocemento con a maneha e isla aki.

 

“Nos tabatin Staatsecretaris Sharon Dijksma, kende a expresa un palabra grandi di reconocemento p’e desaroyo cu e ta mira na Aruba.

Dos dia despues nos tabatin Minister Ronald Plasterk kende a expresa reconocemento grandi; e como Minister di Asunto di Reino, pa locual e ta mira con Aruba a sa di haci pa tuma un situacion sumamente critico y dificil financiero- economico y pone den un ambiente totalmente di stabilidad y perspectiva positivo pa futuro.

Dos dia despues Minister Bert Koenders tabata na Aruba y a expresa no unicamente elogio pa loke nos a haci domesticamente, pero a duna gratitud pa con Aruba a contribui na pone Reino Hulandes riba mapa internacional,” Premier Eman a splica.

 

Pa Prome Minister, esaki kier men cu nos na Aruba tin hopi motibo pa celebra.

“Motibonan nacional, motibo di logronan grandi cu t’asina visibel unda cu nos core riba Aruba, motibo historico, di compromiso di generacion nobo di lidernan cu ta carga nos pais na momentonan critico den e desaroyo di nos pais y motibo di un poblacion cu realmente ta stima e isla y ta hopi dedica pa haci Aruba e isla cu nos tur t’asina orguyoso di dje y manera nos himno ta bisa: No tin nada pa kibre.”

 

 

 

Top