Prome Minister Mike Eman di bishita na Festival Un Canto Na Nos Himno y Bandera Expresion maximo di nos cultura den forma di musica, canto, artesania y cuminda

Den fin di siman Plasa Betico Croes ta bibo cu e manifestacion di nos amor patriotico.

E festival ‘Un Canto Na Nos Himno y Bandera’ a ilustra e talento Arubiano den musica, canto y baile, pero tambe artesania y cuminda. Riba diabierna, diasabra y diadomingo un publico grandi a bini hunto y celebra e abundancia di motibo cu tin pa stima nos dushi tera.

Prome Minister Mike Eman tabata presente pa comparti cu ciudadanonan e presentacionnan bunita y e ambiente crioyo.

 

E festival di canto ta forma parti di e celebracionnan na caminda pa nos Dia Nacional di Himno y Bandera y ta wordo organisa tur aña den tres categoria, esta infantil, hubenil y adulto.

Aki ta caminda nos compositor, arreglista, musico, cantante y bailarinnan local ta haya un plataforma importante pa demostra nan talento, pero principalmente nan sentimentonan profundo pa nos patria. E temanan cu a competi ta papia di e diferente atributonan di Aruba manera su naturalesa y e tantisimo cualidad di su hendenan.

 

Minister President Eman a disfruta hopi di e momentonan riba Plasa Betico Croes caminda e por a combersa cu e publico, tende con nan ta pasando, con nan ta bay celebra 18 di maart, pero tambe invitandonan pa e grandioso inauguracion di Plasa Padu cu ta diabierna awo 17 di maart. Tambe a bishita e diferente stand di articulo y cuminda cu ta sinonimo cu e festival.

E mercado ta un atraccion riba su mes pa tur esnan cu ta busca algo tradicional pa come of e paña di Aruba pa bisti riba Dia di Himno y Bandera. E oferta ta asina amplio cu riba 60 stand ofreciendo sopi, cos dushi tipico, cuadra, acesorio, banderin, petchi y flanel y asina hopi mas pa menciona.

 

Coordinacion di e festival di canto y e feria di producto ta bou coordinacion di Comision Celebracion Dianan Nacional na cual Premier Eman ta duna un palabra di pabien pa e trabou excelente. Tambe e mandatario ta felicita tur participante, tur boluntario y e publico riba su mes pa e sosten balioso cu ta duna na nos dia nacional, na nos talentonan local y na e cultura di Aruba.

Top