Prome Minister Mike Eman: GKMB ta un organisacion importante pa nos comunidad Nan aporte na Accion di Bario ta balioso

Gele Koorts Muskietbestrijding ta forma parti di e ekipo cu siman aden y siman afo ta bishita barionan rond di nos isla hunto cu Prome Minister Mike Eman.

Mescos cu BoBario y Serlimar, GKMB ta haci un papel importante den e programa aki. Ademas di realisa control, ta yuda educa ciudadanonan den prevencion di criadero di sangura, beneficiando asina henter e becindario y nos pais.

 

GKMB ta informa cu apesar cu riba nos isla ta conoce 4 diferente especie di sangura, ta importante pa comunidad trata tur mescos.

Minister President Mike Eman ta consciente di nan funcion importante. “GKMB cada siman cu nos tey den bario, nan ta cu nos. Un organisacion cu ta traha hopi bon. Hopi biaha ora nos drenta un cas, nan ta bisa nos cu nan a pasa caba.

Den e dianan aki nan ta duna hopi informacion di con cada ciudadano mes por cuida e awa cu nan ta conserva pa muha mata pa nan no bira un peliger di salud pa nan mes y nan bario,” e mandatario ta bisa.

 

Ruben Croes, Inspector di GKMB a splica cu: “Evita awa rond di cas, si bo ta warda awa pa mata, tapa esaki bon evitando cu ta forma criadero.

E prome pa wordo pica t’e doño di cas mes y despues e bisiñanan.”Si ta desea di yuda den esfuerzonan aki, tin algun pest control bon ekipa.

Di parti di GKMB mes nan tin insecticida cu cada bes ta mas ‘environment friendly’ y no ta haci daño na ser humano.

“Nos ta bon ekipa pa pueblo di Aruba y esey nos a bin ta haci algun aña caba,” Croes a indica.

 

Top