Prome Minister Mike Eman na Monumento 18 di Maart: “Ora e stimacion ta grandi, nada ta imposibel”

 

Celebracion y homenahe riba Plaza 18 di maart e aña aki tabata un poco diferente cu añanan anterior. Pa rindi homenahe na e 2147 firmante a cende pa cada un un bela mientras cu e nombernan tabata aparece riba un pantaya grandi y lesa pa tur presente tende y mira ken nan tabata, e 2147 hombernan balente yen di curashi cu den un tempo dificil, unda no tabatin ni luz y un infrastructura pober a reuni na cas y clubnan pa pone nan firma bou di un peticion cu a bay Hulanda unda nan a pidi pa Aruba ta ‘baas den su mes cas’.

Esey Prome Minister a enfatisa tambe den su discurso cu manera semper na momentonan asina, ta uno emocionante. Su bisabuelo, abuelo y tata tabata entre e pioneronan di e lucha sagrado aki. Hunto cu e e pueblo di Aruba nan a logra supera retonan grandi.

 

Prome cu Prome Minister a cuminsa cu su discurso el a pidi aplauso pa dos firmante cu tabata presente riba e Plaza hunto cu nan famia. Nan ta Jose Pascual Fingal y Frans Croes, ambos di edad respeta, pero firme presente, mescos cu nan a haci na 1947 ora nan a firma e peticion cu na 1948 a wordo entrega durante reunion di Mesa Rondo dor di Shon A Eman na su Mahestad. “Ora nos aki nan wak den e liñanan di nos famianan nos ta mira un tata, un omo, un welo, un bisabuelo cu ta representa cu nan firma aki den e lucha y e causa cu a wordo inicia na cuminsamento di siglo pasa”, sr. Eman a bisa.

 

“Awe cu nos ta para akinan nos curason ta brota cu emocion, amor y respet pa locual nan a nifica pa nos pais. Ora cu un isla di e tamaño di Aruba cu e poco recursonan cu tabatin na inicio di siglo pasa, por tabatin e curashi, por tabatin memei di dj’e personanan cu e talento y amor patrio pa mira den e isla chikito aki e potencial cu Aruba un dia por ta ‘baas den su mes cas’, cu nan a uni riba e suelonan aki den un momento cu cosnan no tabata asina cla manera cu e ta awe, ta muestra di balentia. Si mira awe e desaroyo economico no por haci nada otro cu conclui cu Aruba por cana riba su mes den e mundo grandi aki. Algo cu no tabata asina cla na inicio di siglo pasa”, sr. Eman a bisa e presentenan.

 

“Asina mes e pioneronan aki a sinti den nan curazon cu tin algo special cu e baranca aki. Cu cada persona cu tabata biba riba e suelonan di e isla aki tabatin algo hopi special cu ta haci posibel cu e soño pa ta baas den nos mes cas ta realisabel y cargabel pa e pueblo aki. Esey ta e stimacion cu nos tin pa e pida baranca aki. Ora e stimacion ta grandi, nada ta imposibel”, sr. Eman a recorda e publico cu tabata scuche cu masha atencion.

E anochi a cera cu cendemento di bela cu a ilumina henter e Plaza 18 di Maart.

Top