Prome Minister Mike Eman “Nos ta percura p’e inspiracion di nos programa ‘Hoben y Talentoso’ por sigui inspira otronan henter aña”

Prome Minister Mike Eman tabatin oportunidad di topa cu e homenageadonan di Hoben y Talentoso 2017 un biaha mas.

E encuentro, manera e mes a splica, ta sirbi dos motibo importante. Den sala di Expo Bo Aruba na final di Caya Betico Croes, a haci entrega di e buki na cada hoben cu su respectiva dedicatorio personal for di e mandatario.

Di otro banda, tambe a splica n’e grupo y nan mayornan con e reconocemento no a caba cu e anochi di ceremonia, of cu e entrega di buki; pero ta continua cu un exposicion cu lo recore scolnan y otro lugarnan publico di nos isla.

 

“E dedicatoria ta expresa nos aprecio y admiracion pa loke boso a logra y ta sirbi como inspiracion pa otronan,” Premier Eman a bisa refiriendo na loke el a scirbi personalmente den cada buki.

Adicionalmente, cada homenageado a ricibi un cantidad di buki extra p’asina por comparti esaki cu famia y otro sernan keri.

 

Den sala di Expo Bo Aruba, e hobennan a haya un bista con nan potret y storia, mescos cu esun di e esnan homenagea den e edicionnan anterior, ta wordo exhibi.

“E no ta caba cu e publicacion di e buki, pero e idea di ilustra boso ta sigui henter aña,” Minister President Eman a bisa su invitadonan.

E exposicion di Hoben y Talentoso ta bishita scolnan secundario rond di nos isla, mescos cu Biblioteca Nacional, MFA y otro lugarnan caminda publico, y particularmente muchanan por lesa nan y haya inspiracion.

 

Asina nos ta contagia otro Arubianonan pa nan tambe fiha metanan cu cual nan por resalta riba tereno di deporte, arte, educacion, cultura, inovacion y mas.

Hoben y Talentoso ta un iniciativa di Minister di Asunto General Mike Eman kende a celebra e aña aki su prome lustro. Pa mas informacion y pa nomina hobennan p’e proximo edicion, por bishita e pagina di Facebook di Hoben y Talentoso.

 

Leave a Reply

Top