Prome Minister Mike Eman orguyoso di a logra ‘Batting Cage’ pa veld di Calabas

 

Recientemente Rockets Baseball Organization a inaugura y mientrastanto ta haciendo bon uzo di nan ‘batting cage’.

E siman cu a pasa a keda finalisa instalacion di e ‘Batting Cage’ riba veld di Calabas. Un herment sumamente importante den desaroyo di hobennan basebolista na Aruba.

 

Prome Minister Eman na momento di e inauguracion a splica di tabata sumamente contento cu e proyecto di un ‘Batting Cage’ pa veld di Calabas a keda instala y finalisa.

A haya cooperacion di ATCO, cual compania a basha e fundeshi y a yuda e ekipo di softball, pero tambe Kiwanis cu tabatin un contribucion grandi n’e ekipo Hammershark, Lotto cu a patrocina e yerba, esnan cu ta maneha e veld di Calabas y sin lubida tambe tur boluntario, chikito te grandi.

Prome Minister Eman a gradici tur pa nan sosten, cooperacion y trabou den e bunita proyecto aki.

 

E mandatario tabata hopi emociona di mira asina hopi mucha, hoben y adulto cu a acudi na inauguracion di e ‘Batting Cage’, cu a wordo dedica na Detchi Tromp (dfm), kende tabata un persona cu un curazon grandi pa Calabas y semper a traha pa mantene e veld den condicion p’e wordo uza dor di habitantenan di e bario.

 

“E ta un di e pioneronan, hunto cu su famia, cu a carga e veld di Calabas. Pesey tabata un honor pa dun’e su reconocemento awe den presencia di su esposa, sra. Lea, kende tambe tabata hopi emociona cu e dedicacion na su esposo.

Ami tabata yame e Alcalde di Calabas, luchando semper p’e veld y su bario.”

E mandatario a recorda con Detchi tabata comparti loke cu e pisca cu tur esnan cu bishit’e.

“Den su veranda patras ta hopi hende a sinta come, inclusive mi persona,” Prome Minister Eman a expresa.

El a agrega cu e dedicacion y amor grandi di Detchi pa su bario, a dicidi cu ta pone e batting cage na su nomber.

 

Prome Minister Eman a expresa e atardi aki, cu Departamento di BoBario di su Ministerio ta trahando awor riba e otro proyecto p’e bario di Calabas, cu ta luz p’e veld.

Aworaki e veld por wordo uza unicamente den dia. El a bisa esnan presente “nos tin e fondo inicial p’e luz cu nos a logra pone hunto cu esfuerso di BoBario, pero e suma no ta suficiente ainda.

Sinembargo nos ta sigur cu e proyecto ey tambe lo wordo realisa den nomber di Detchi y Leon, kende ta traha duro pa e club.”

 

Por a sinti un gradicimento hopi grandi di e deportistanan di e bario pa loke Gobierno ta realisa pa promove deporte den e bario.

Prome Minister Eman a crea un grupo di boluntario cu a yuda drecha e cura y tribuna n’e veld di Calabas.

E vision di Gobierno di Aruba ta cu na Aruba tur veld mester por tin tur e hermentnan pa por duna e hoben deportistanan e mihor sosten cu ta posibel pa nan desaroya nan mes.

Asina a cuminsa cu iniciativanan pa por logra esaki pa tur skina di Aruba, aunke e trabou ta uno grandi y extenso, a pone man na obra p’asina por logra e meta pa tur deportista por tin e mihor hermentnan na nan disposicion.

 

Deporte p’e mandatario ta un forma pa crea un generacion di hobennan sano cu ta futuro lidernan di e pais.

Banda di sostene y activamente participa den restauracion di veldnan rond di Aruba, instalacion di ‘Batting Cages’ ta un herment sumamente importante pa desaroyo di basebolistanan na Aruba. Mescos tambe, cu sosten di FCCA y Team BoBario, Prome Minister a inaugura mini-veldnan di yerba artificial cu ta un otro herment sumamente importante pa Aruba su hoben futbolistanan.

 

 

Top