Prome Minister Mike Eman: Plan pa renobacion di scolnan existente y construccion di scolnan nobo ta expande te cu 2020

Cu un lista largo di proyectonan chikito y grandi di renobacion, como p. e. renobacion di La Salle College, Colegio San Antonio y Abraham de Veerschool, Gabinete Mike Eman a haci hopi mas pa e infrastructura di enseñansa, cu cualkier otro Gobierno den historia di Aruba.

Asina mes, tin hopi trabou mas cu ta pendiente y Prome Minister Mike Eman a duna di conoce e siman aki cu pronto lo anuncia, hunto cu Minister di Enseñansa y e titular di Infrastructura, cual ta e siguiente fase den nan plan di accion, uno cu por cierto ta core te cu aña 2020.

 

“Sigur tin scolnan nobo cu mester wordo construi, manera e MAVO/HAVO/VWO di Noord cu ta den e proceso pa nos logra esey tambe. Y tin scolnan nobo manera Prinses Amalia School cu ta wordo construi y tin cu nos mester wordo restaura. Nos tin hopi scol na Aruba cu ta monumento y parti di historia cu nos ta haya importante como scol pa renoba nan, pero tambe como monumento; y p’esey hopi enfasis ta wordo poni riba renobacion di scolnan y restaura edificionan monumental”, asina Prome Minister a declara na final di e inspeccion cu a haci na trabounan di Rosa College.

 

Dos scol cu ta siguiente riba e lista di prioridad ta Reina Beatrix School y Juliana School cu ta dos monumento di historia di pais Aruba. E mandatario a splica cu tin scolnan cu tin hopi urgencia, cu tin necesidad pa mantencion pero cu no necesariamente ta interumpi scol y scolnan cu mester di renobacion grandi y cu mester traslada e studiantenan temporalmente pa otro scol. Tur esaki ta inclui den e plan pa 2017, 2018, 2019 y te cu 2020 pa asina caba di tin tur scol na Aruba renoba, mescos cu practicamente a renoba tur edificio di gobierno y monumental cu tin.

Top