Prome Minister Mike Eman sumamente contento cu Dakota a haya su mini cancha di futbol

Alegria a reina na Centro di Bario y Deporte Dakota (CBDD) diahuebs atardi na momento cu a realisa e apertura oficial di mini cancha di yerba artificial pa practica di futbol.

Centro di Bario Dakota t’e di cinco punto riba e isla pa ricibi e facilidad aki despues di Centro di Bario Brazil, RCA, Bushiri y Madiki.

Directiva a hinca un programa den otro cu a inclui discurso di Presidente di Hunta Directiva di CBDD, Jair Oduber expresando e importancia di un facilidad asina pa henter e bario, en particular p’e muchanan cu ta warda su apertura cu hopi emocion.

 

Pa rindi honor na un persona cu ta un baluarte di e bario, un leyenda di futbol local y cu te dia di awe ta un pilar di e Centro di Bario, a dedica e cancha na sr. Jubi Richardson. Esaki tabata visiblemente un momento hopi special pa Jubi Richardson.

Tres mucha di di seleccion infantil di futbol a skop bala hunto cu Prome Minister Mike Eman y di e manera ey a haci e apertura oficial di e cancha.

 

Despues di esaki Premier Eman a hiba palabra pa tur esnan presente expresando su satisfaccion di wak con otro cancha ta cla y grandi y chikito di e bario ta disfruta di dje.

Hunto cu Eman tabata presente Minister di Husticia Arthur Dowers y Minister di Asunto Economico, Richard Arends.

E mini canchanan cu yerba artificial ta un iniciativa di Minister di Asunto General Mike Eman bou coordinacion di Ditto Acosta di oficina BoBario.

 

E proyecto ta posibel danki n’e patrocinio di e Programa Olympamerica di e Organisacion Deportivo Panamericano atrabes di Comite Olimpico Arubano bou presidencia di sr. Roy Mezas.

E proximo canchanan cu lo keda cla t’esun na Arsenal diabierna mes sigui pa dialuna na La Fama. Asina lo sigui tambe otro canchanan na Cura Cabai Zuid, Washington y Ayo.

 

Top