Prome Minister Mike Eman ta anuncia serie di celebracion rico na historia, cultura y patriotismo

Dialuna mainta Prome Minister Mike Eman, como hefe di Gobierno, titular di Asunto General y Minister di Cultura, a ofrece un conferencia di prensa pa informa riba e serie di celebracion en conexion cu nos Dia Nacional di Himno y Bandera.

For di Sala di Prensa di Gobierno, Premier Eman, como tambe representante di Comision Celebracion Dianan Nacional (CCDN) otro instancianan publico, a duna detaye di e diferente actividad cu ta tumando lugar y lo bin den e proximo dianan.

 

“Ta comparti henter e programa y tur desaroyo cu nos ta considera sumamente importante cu comunidad pa haci’e realmente un celebracion nacional,” Premier Eman a indica na inicio di e conferencia.

Pa cuminsa, e celebracion di 2017 ta haya un contexto adicional n’esun custumbra. Scolnan di enseñansa primario ta participando den un competencia di pintura.

Asina ta brinda nos talentonan hubenil e oportunidad di expresa, pa medio di arte, nan sentimentonan patriotico.

Den e fin di siman nos dilanti, esta 10, 11 y 12 di maart, lo tin e popular Festival di Canto, ‘Un Canto na nos Himno y Bandera’ den su diferente categoria compaña pa mercado di cuminda y artesania.

 

Diarazon 15 di maart lo tin e competencia di ‘Poeta di Patria’, cu ta otro iniciativa pa duna realce n’e aspecto di cultura y arte den nos comunidad.

Diahuebs 16 di maart lo tin un ceremonia conmemorativo na Monumento 18 di Maart caminda ta bay rindi honor n’e 2.147 ciudadano Arubiano cu a firma e mocion cu a keda presenta den Conferencia di Mesa Rondo na Hulanda na 1948.

Ta bay haci esaki invitando famia pa hunto sende un bela pa cada un dia nan.

 

Diabierna 17 di maart lo tin e grandioso inauguracion di Plaza Padu cu t’e coronacion di henter e renobacion di centro di ciudad y t’e nucleo di e centro historico y di gobernacion di Aruba. Diasabra 18 di maart ta cuminsa cu un bishita n’e monumentonan di e tatanan di nos patria, esta defuntonan Henny Eman, Shon A Eman, Juancho Yrausquin y Betico Croes; pa despues sigui cu e ceremonia protocolar riba Plaza Betico Croes cu ta inclui nos gran Desfile Nacional.

 

“Cada dia ta excepcional; cada un lo tin su momentonan grandi cu nos no por bisa cu un ta mas importante cu e otro. Lo tin balor grandi den reconocemento di historia y cultura di Aruba y ki mas bunita cu den luna di cultura pa duna reconocemento na e co-compositor di nos himno nacional cu ta sr. Padu Lampe cu danki Dios ainda ta cu nos y lo ta parti grandi di e celebracion di nos dia nacional,” asina Prome Minister Eman a declara.

 

Como cu e programa tin un cantidad di aspecto organisacional, Gabinete Mike Eman II a institui un comision cu ta trahandno duro riba e reto adicional di inauguracion di Plaza Padu. E actividad tin un parti ceremonial, pero tambe dos concierto tumando lugar riba plaza Niki Habibe y Plaza Daniel Leo.

Miembronan di e comision ta: Philippe Lareine, President; Siegfried Dumfries, tesorero; Esther Gomez, Secretaria y Robert Maduro di CCDN, Alice van Romondt, Isella Wernet, Landa Henriquez, Vivian Lampe, Allan Goede, Michael Lampe, como miembro.

“Nos ta spera cu henter nos comunidad por participa pasobra e programa, manera nos a desaroy’e, ta pa grandi y chikito, ta pa cada un por sinti den nos curason e amor patriotico cu nos tin pa nos isla stima y e honor cu nos kier duna tambe n’esnan cu a carga esnan cu a lidera nos pais n’e momentonan mas importante y trascendental di nos historia.

 

E nombernan cu ta graba riba e monumento, e monumento na Padu, estatuannan cu nos ta bay bishita, cada un ta para pa un trabou y un sacrificio cu awe nos por corona un obra grandi di rescate di Aruba su parti visual fisico y partinan economico y social,” t’e palabra di Premier Eman.

 

Top