Prome Minister Mike Eman ta dedica MFA Savaneta na famia van der Linden

Diaranson atardi Prome Minister Mike Eman personalmente a compaña famianan di defunto Shon Lang van der Linden den un recorido di e edificio di MFA Savaneta.

Actualmente den construccion, e di tres facilidad multifuncional cu ta bay habri su porta na Aruba lo ta dedica n’e gran Arubiano y Savanetero aki.

Durante e recorido por a mira pa nan mes con bunita e edificio ta y haya un splicacion di tur e servicionan cu lo bay ofrece.

 

Pa Minister President Eman esaki tabata un momento hopi special cu e ta hopi contento cu e por a comparti cu yiu, nieto y sobrino di Shon Lang.

Gerente di MFA Savaneta, e tambe Savanetero Kimberly Boekhoudt a comenta cu ‘ta importante pa nan tambe bin y wak con e desaroyo ta bayendo di e edificio.

Tin hopi entusiasmo pa loke t’e edificio y pa ora cu e keda cla, loke ta bin aden. Tin hopi detaye; nos ta bezig cu mueble, entre otro, pero tur cos ta bayendo bon.’

Construccion di MFA Savaneta ta programa pa keda cla den luna di juni y ta spera cu realisa e apertura caba un luna despues.

 

‘Shon Lang semper tabata kier pa Savaneta tin un lugar caminda por siña e muchanan di musica y pa hopi tempo el a haci’e na su mesun cas. El a dedica hopi aña di su bida na formacion di diferente grupo musical, pero tambe pa inculca den muchanan e amor pa musica,’ asina Premier Eman a splica.

Soño di Shon Lang ta bira un realidad ya cu MFA Savaneta ta conta cu sala di reunion caminda organisacionnan local por duna les na muchanan, pero tambe tin un podium pa duna presentacion na publico.

 

Manera Prome Minister Eman a indica, MFA su meta principal ta pa acomoda servicionan di Hulpbestuurskantoor, pero cada MFA a wordo construi mas grandi.

Ekipo di Maneho di MFA ta busca otro departamento di Gobierno pa duna servicio.

P.e., ‘e intencion ta pa Servicio di Impuesto tin un sucursal na MFA Savaneta, pero tambe tin interes di laboratorio, tin interes di parti di Polis di Bario y tin interes pa un loke huridico pa brinda asistencia na ciudadanonan prome cu bay na abogado.

Esaki ta un pilot project cu si e bay bon, lo ripiti na otro MFA,’ Eman a duna di conoce.

 

Leave a Reply

Top