Prome Minister Mike Eman: Ta importante haya informacion directo di funcion importante di piscado pa nos duna sosten husto

Den su encargo adicional como Minister di Sector Primario, Prome Minister Mike Eman a realisa diadomingo ultimo un recorido di e piernan di piscado for di Seroe Colorado pa Hadicurari.

Hunto cu Departamento di Agricultura Cria y Pesca Santa Rosa y directiva di Centro di Pesca Hadicurari, Minister President a tuma nota di e piernan cu ta den mal condicion y esnan cu ta den bon condicion, pero cu tambe tin su retonan.

 

Premier Eman su obhetivo ta pa haya un bista directo di e situacion p’asina por tuma accionnan cu ta trece mehoracion y beneficio.

E prome pier na Seroe Colorado ta uno cu mester di hopi atencion. E pier mester di reconstruccion y e luznan cu ta guia e piscadonan pa drenta bek, no ta funciona.

Prome Minister Eman a splica cu n’e pier di Noord Cura Cabai e situacion ta diferente, pasobra tin hopi trabou andando caba pa mehora e facilidad di e pier, pero tambe e beach banda di dje.

 

Asina mes, e piscadornan a haci peticion pa iluminacion publico cu por brinda mas seguridad. E pier na Waf di Rancho tambe ta den bon condicion.

Aki e piscadornan a papia cu Premier Eman pa bin cu tuberia di awa, electricidad, parkeo y tambe un gazebo pa sconde poco di e solo fuerte.

“Tin bes bo ta kere cu bo ta wak un pier cu ta mustra bon, pero tin otro retonan,” asina Prome Minister Eman a bisa.

Por ehempel, den e caso di Spaans Lagoen, e pier ta den un situacion deplorabel y aki ta bay tuma paso liher.

 

Awor cu a haci inventarisacion y Prome Minister a wak cu su mesun wowo kico t’e situacion, ta bay sinta cu Santa Rosa y directiva di Hadicurari.

Prome Minister Eman ta kere cu probablemente e mihor paso ta pa Gobierno pone tur pier bou guia di Hadicurari y asina ta percura p’e mesun profesionalismo cu tin na un pier, ta keda introduci na otro piernan.

Esaki ta un maneho cu ta sigura cu e piscadornan ta haya atencion pa tur nan necesidadnan.

 

“Nos meta ta pa aumenta e cantidad di cuminda propio cu nos ta produci na Aruba, tanto di plantacion como di pesca.

Dunando un sosten husto na nos piscadornan nos ta logra cu nan ta mas anima y e famia ta mas grandi,” Minister President a splica.

 

Leave a Reply

Top