Prome Minister Mike Eman y delegacion Arubiano den experiencia enrikecedo na Pereira

Riba e di dos dia di Risaralda Bird Festival na Colombia, delegacion Arubiano encabesa pa Prome Minister Mike Eman a bishita Parke Botanico di Universidad Tecnológica di Pereira.

E experiencia tabata uno sumamente agradabel pa mucha, hoben y representantenan di gremionan cu a asisti.

Prome Minister Eman tabatin oportunidad, mescos cu mainta durante e conferencia, pa hiba palabra.

Esaki ta banda di otro invitado special di e evento, como p.e., Presidente di Colombia Juan Manuel Santos, Minister di Comercio y Gobernador di Pereira.

 

E Parke Botanico ta un atraccion grandi e departamento den zona cafetero di Colombia. E ta conta cu 13 hectare di hofi cu ta cas pa 160 specie di parha.

Un y tur a disfruta enormemente di e recorido cu a haya guia p’e expertonan di e parke.

Prome Minister Eman a ser mira na mas di un ocasion expresando su admiracion y tambe sacando potret di e bestianan.

 

Naturalmente, e bishita tabatin un obhetivo adicional y profundo. Durante e encuentro a intercambia experiencia e idea cu profesionalnan den e tereno di medio ambiente, turismo y tambe parhanan.

E ultimonan aki a comenta cu nan kier siña for di nos den industria turistico, mientras cu di nan banda, ta ofrece productonan cu por ta complementario pa turismo di Aruba.

 

E delegacion Arubiano cu ta inclui tambe Presidente di ATIA, sr. Ronny van Trigt y Presidente di Aruba Bird Life Consevation, drs. Greg Peterson, ta na Risaralda, departamento di Pereira Colombia, pa participa den e actividadnan di e festival, te cu diahuebs.

Top