Prome Minister orguyoso di e tesis di Ryçond do Nascimento

Prome Minister Mike Eman diahuebs anochi a expresa di ta sinti su mes hopi orguyoso cu un tesis di doctor ta wordo defendi na Aruba. Esaki el a bisa despues di a presencia pa su mes e defensa cu Ryçond do Nascimento a haci pa su tesis titula “Het Koninkrijk ontsluierd”.

“Mi ta sinti un orguyo grandi ora cu un yiu di tera promove y scoge pa hacie na Universidad di Aruba. Esaki ta e prome doctor cu ta defende su tesis na Universidad di Aruba”, Minister Eman visiblemente satisfecho a expresa.

 

Na mesun momento a bini den mente di e mandatario co-fundado di Universidad di Aruba, dr. Mito Croes (d.f.m.), kende, si tabata na bida, tambe lo a sinti un orguyo grandi pa mira cu Aruba ta crea su mesun profesionalnan gradua cu e titulo di doctor. Eman no por a lubida su amigo y consehero mr. drs. Piet Pronk (d.f.m.), kende semper a sinti un orguyo grandi di Aruba su Universidad.

 

E tesis, ‘Het Koninkrijk ontsluierd’, tin un relevancia grandi riba e discusionnan cu tabatin y tin den Reino, segun Prome Minister Eman.

“Tin biaha ora cu e discusionnan aki ta wordo hiba na nivel politico, nan ta haya un tono emocional y no semper ta keda hopi cla pa e ciudadano di cuanto rason Aruba tin. Awe nochi por a scucha e presentacion y tesis di Ryçond, unda cu e ta bisa cu un sistema constitucional, un sistema democratico, mester ta basa rib’e hecho cu e pueblo su bos ta esun cu finalmente ta dicidi”, el a expresa.

 

Den Reino a traha un Statuut, unda cu a bisa cua ta e temanan di Reino. “Nos mes a entrega eseynan pa haci na temanan di Reino, manera Defensa y Relacionnan Exterior. Pero temanan cu nos a bisa ta temanan nacional no por wordo haci temanan di Reino, manera p. e. ora cu presupuesto di Aruba. Dr. do Nacimento a splica esey hopi bon. Y tambe e forma con Gobernador a wordo nombra ta den linea recta contra henter e sistema constitucional”, el a continua bisando.

 

Prome Minister Eman ta kere cu e tema importante cu e tesis aki ta bay contribui na dj’e ta e discusion cu tin ta rib’e hecho cu na momento cu un decision manera ariba menciona wordo tuma, den Conseho di Reino mester tin un instancia independiente na unda por acudi pa pone e diferencianan di opinion huridico na discusion. Esaki pa mira si ta trata un tema di Conseho di Minister di Reino of di e pais.

“Mientras cu no tin e instancia aki ta keda haya polarisacion inecesario den Reino. Nos tur ta kere den Reino y kier pa e funciona”, e mandatario a splica.

 

E instancia Prome Minister a papia di dj’e ta algo cu dr. do Nacimento ta pidi p’e tambe den su tesis. “Mi ta haya cu el a duna un contribucion grandi pa cual mester busca un solucion cientifico.”

Top