Pueblo completo por conoce desaroyo di Aruba y aporta na su futuro a traves di www.boaruba.aw

Dialuna mainta Prome Minister Mike Eman den presencia di Minister di Infrastructura Benny Sevinger a anuncia e lansamento di e website yama: www.boaruba.aw cu ta habri tambe si ta pone e extension ‘.com’.

E plataforma di informacion digital ta combina cu salanan di exposicion fiho na Oranjestad y San Nicolas, como tambe ambulante na sedenan di MFA rond di Aruba cu ta inicia dia 1 di augustus proximo.

 

E obhetivo tras di e iniciativa aki, manera Minister President Eman a splica, “ta pa haci posibel cu comunidad ta participa den e desaroyo di nos pais, tanto pa continua dunando informacion riba desaroyonan cu ta andando, pero tambe pa capta e idea y pensamentonan di nos conciudadano rib’e futuro desaroyo di Aruba.”

 

E prome sala ta ubica na ex local di Acme Store na Columbustraat dilanti di Plasa Nikki Habibe. Lo bin otro na San Nicolas, probablemente na sede di e edificio restaura di Nicolaas Store.

Otro exposicionnan temporal lo pasa dor di e diferente sedenan di MFA manera Noord, Paradera y Savaneta cu lo habri pronto. Aki ta dispone di salanan sumamente activo di ciudadanonan cu ta yega y ta duna un gran oportunidad pa expone e proyectonan importante di pais Aruba.

Asina ta informa comunidad di e vision nan tras y unda nan ta hiba nos.

 

“Den e salanan y virtualmente, pueblo Arubano por haya un idea di e vision cu Gobierno tin no unicamente pa loke nos a desaroya caba, pero tambe pa loke nos ta visualisa pa futuro”, Prome Minister Eman a splica.

Den henter e proceso aki, e mandatario ta spera di por haya hopi reaccion, idea y pensamento di e conciudadanonan bisando, p. e. cu por pone mas atencion riba algo of si a pensa riba esun otro.

 

No tin limite p’e temanan cu por trece dilanti. Por opina riba renobacion di nos barionan, sostenibilidad, reconocemento di nos propio identidad, nos monumentonan, nos hobennan, nos naturalesa, etc.

“Henter e vision total di un Aruba sostenibel tecnologicamente, ecologicamente, social-economicamente, tur ta bay keda presente den e sala aki y den otro salanan. Tur esaki ta forma parti di e miho manera pa laga pueblo participa den e desaroyo y duna nan pensamento pa futuro”, Premier Eman a declara.

 

E ta gradici Oficina di Inovacion y Ministerio di Infrastructura cu ta haci hopi di e proyectonan aki.

“E ta un vision grandi cu ta wordo realisa tur dia. Bo ta wak e den bo bario; si bo no wak e na luz, bo ta wak e na caretera, bo ta wak e na e scolnan cu ta wordo renoba, of bo ta wak e na e MFA.

Tambe bo ta wak e riba bo payslip na e Repartietoeslag, na e Schoolkinderentoeslag, na un aumento di pension of na e aumento di salario minimo.

Den tur forma e vision aki ta pa trece felicidad den cada hogar di nos ciudadanonan y cu trabou duro nos ta haciendo e posibel, pero nos kier pa nos comunidad participa continuamente den e desaroyo y p’esey e salanan aki di encuentro tur rond di Aruba.”

Top