Pueblo cu decision bon cla: Coalicion AVP y MEP

Pa: Victor (Toko) Winklaar

 

Diabierna ultimo pueblo di Aruba a haci uzo di su derecho pa scoge e Gobierno cu e ta desea di dirigi e pais pa proximo periodo di gobernacion y ora cu analisa resultado di eleccion, caminda AVP a keda e partido mas grandi, tin cu confirma cu pueblo tabata sumamente cla den su decision, esta un Gobierno di coalicion di AVP y MEP cu lo ta un Gobierno di 18 asiento.

 

Pa recorda palabranan semper utilisa pa sr. Betico Croes, den feliz memoria, den su lucha pa libertad di Aruba, esta cu “Vox Populi, Vox Dei”, esta cu Bos di Pueblo ta Bos di Dios, e resultado di eleccion y e Gobierno cu pueblo kier mira, ta un coalicion di e dos partidonan mas grandi cu el a scoge.

Pueblo a papia palabra cla diabierna ultimo, dunando un mandato n’e dos partidonan grandi di Aruba y bou di ningun circunstancia por interpreta resultado di eleccion di diabierna ultimo, como un resultado cu ta duna un di e dos partidonan chikito mandato pa carga responsabilidad den nomber di e pueblo aki.

Pueblo votado a duna partido AVP un total di 23.385 voto, mientras cu partido MEP a haya sosten di 22.078 voto cu ta bisa tur cos di e deseo di pueblo di Aruba pa loke t’e proximo periodo di gobernacion.

 

Bou di ningun circunstancia por sikiera papia cu e otro dos partidonan cu a logra di haya representacion den Parlamento di Aruba, esta partido POR cu 5531 voto y partido RED cu 4167 voto, ta escogencianan di pueblo pa bay forma parti di gobernacion di nos pais.

E resultado no por wordo interpreta di otro forma y realmente e momento a yega p’e dos partidonan aki, rivalnan politico grandi di otro, sikiera respeta e decision di pueblo y sinta na mesa pa atende cu e decision di pueblo aki.

Pa hopi kisas esaki lo t’e coalicion perfecto cu por tin, caminda ambos partido tin suficiente poder y responsabilidad, pa hiba un mihor control riba gobernacion pa proximo 4 aña, caminda pueblo kier mira un coalicion caminda transparencia lo t’e base solido di un Gobierno asina.

 

Pueblo a papia den forma cla diabierna anochi, ya cu mientras cu no a duna AVP un mandato completo bek, el a duna e partido suficiente voto pa keda esun mas grandi y a scoge partido MEP pa forma parti di gobernacion y asina mira con ta bay atende cu asuntonan di vital importancia pa nos pueblo.

Ningun otro partido a haya mandato di pueblo votador pa por yama nan mes e “yabi” di cualkier posibel coalicion y sigur ora cu e expectativanan tabata mas grandi pa partido POR, cu no a logra loke e partido a anticipa despues cu pueblo a tuma su decision.

 

En berdad un coalicion di AVP y MEP ta mustra dificil, pero ta un decision cu pueblo a tuma y no tin otro forma pa analisa e resultado aki y dun’e un otro nificacion cu pueblo no a vota p’e diabierna ultimo.

Si duda e decision di pueblo aki tin cu wordo tuma na consideracion y realmente ta un posibilidad cu lo por duna un rumbo diferente na nos sistema di hiba politica aki na Aruba, sigur cu e dos partidonan grandi trahando banda di otro, controlando otro y percurando pa pueblo semper ta bon informa di tur loke ta pasando.

Esaki lo trece un cambio tambe den e sistema di atende reunionnan den Parlamento caminda tradicionalmente partidonan di oposicion ta opone tur loke e Gobierno na mando ta presenta, pero cu awor c’un base di sosten di 18 miembro, esaki por cambia mentalidad politico den e Conseho Legislativo di nos pais. Y caba asina cu Stempel-Parlament, manera tur partido ta desea.

 

E resultado di diabierna sigur tabata un sorpresa grandi, sigur a percura pa frustracion grandi cerca hopi politico, pero un biaha mas, Vox Populi, Vox Dei, caminda pueblo a papia y pueblo a dicidi y e cambio mas grandi ta cu pueblo a dicidi di no brinda un solo partido e mandato completo e biaha aki.

Bou di ningun circunstancia pueblo diabierna ultimo a vota pa nos bay bek n’e situacion den pasado caminda masha poco Gobierno di coalicion a wanta nan periodo completo pa motibo cu net esnan cu no a haya sosten suficiente di pueblo pa carga responsabilidad, a abusa di e ‘cabey’i boto’ cu nan a haya pa goberna, mientras cu pueblo ningun momento a dicidi esaki.

 

Si realmente mester bin cambio den nos tradicion y mentalidad politico, e resultado di diabierna ultimo cu pueblo a tuma, haciendo uzo di su derecho sagrado pa scoge e Gobierno cu e mira na mando e proximo 4 aña.

No por interpreta e resultado aki di otro forma ya cu pueblo a papia cla, pueblo a tuma un decision dicidido y esaki tin cu wordo respeta na tur momento caminda pueblo mes kier mira e cambio grandi aki den politica di su pais.

Gritonan emocional cu a wordo haci despues di resultado di eleccion tin cu bolbe wordo analisa ya cu ta solamente dos partido so por papia di victoria real, y esakinan ta partido AVP y partido MEP cu pueblo a duna 9 asiento cada uno y ningun otro partido cu a participa diabierna den e proceso electoral, por papia di ‘triunfo’ ya cu ningun otro partido a yega den becindario di e cantidad di voto di sosten cu pueblo a duna e dos partidonan grandi.

 

Apenas un di e partidonan aki cu a haya representacion den Parlamento, a logra di pasa 5000 voto cu ta ni yega 25% di e total di voto di e partidonan grandi, pues por practicamente conclui cu nan no a haya mandato for di pueblo pa asumi responsabilidad den gobernacion di e pais.

Vox Populi, Vox Dei y pueblo a papia diabierna palabra cla!!!!!!

Nan mester demostra di tin madurez. Si na Hulanda por, pakico na Aruba no!!

 

Top