Pueblo ta invita pa atardecer cu musica di antaño y di awo

Dia 23 di april venidero, amantenan di musica por disfruta di un dushi atardi musical den e sala chikito di Cas di Cultura. E programa ta den man di Livio Hermans.

 

E programa ta consisti di dos parti. Prome cu pausa Livio lo toca musica clasico y di algun compositor e. o. di Corsou. Despues di pausa nos por gosa di musica di diferente compositor di Aruba. Lidwina Booi y Igmar Maduro tambe lo interpreta diferente cantica.

 

Musica di siglo 18 (e. o. menuet (Boccherini, Mozart) y di siglo 19 mazurka y wals (Chopin), di siglo 20 musica di Venezuela, Corsou y di ARUBA (e. o. Oswald Wever, Rufo Wever, Padu Lampe).

 

Ora Livio a haya sa di e trabou cu Zuster Graciela ta haci pa yuda esnan den necesidad, especialmente na San Nicolas, el a dicidi di organisa e atardi aki p’asina e y nos indirectamente por yuda Zuster Graciela cu su bunita trabou.

 

E atardi ta cuminsa 5’or y entrada ta 25 florin pa persona. Carchi ta obtenibel for di 4’or y 30 na entrada di e sala na Cas di Cultura. Nos ta invita henter pueblo di Aruba pa bin presencia e bunita concierto aki. Un peticion: Si ta posibel, paga cu placa exacto.

Leave a Reply

Top