PWA windsurfing disciplina di ola a ser dicidi na Sylt, Alemania

Tres evento durante 2017 na Gran Canaria, Tenerife, y Alemania ta mira Sarah-Quita mehora su prestacion den e disciplina di Ola.

Apesar cu Sarah-Quita no ta procedente di un pais unda tin ola pa train p’e disciplina aki, esaki no ta impidi’e pa logra conkista e segundo lugar tanto na Tenerife y como tambe na Alemania.

 

Mescos cu den e disciplina di Ola unda e morocho Daida y Iballa Ruano-Moreno tabata domina y Sarah-Quita a termina cu e dominio aki na 2008, nan ta sinti e rosea cayente di SQ den nan nek.

Iballa den su discurso a reconoce e prestacion di Sarah-Quita unda na Tenerife e mester a bataya den un super final contra SQ pa gana e evento ey.

Na Alemania Sarah-Quita ta bati Daida y pa 0.3 punto Iballa ta scapa na su man.

 

Finalmente e evento na Sylt, Alemania tabata bon concuri cu mas di 200.000 bishitante. Iballa ta logra e promer lugar. Sarah-Quita,segundo  y Daida tercer lugar di e evento.

Cu e ultimo evento aki e titulo mundial den ola a bai pa Iballa Ruano Moreno, e di dos lugar pa Daida Ruano Moreno y di tres lugar pa Sarah-Quita Offringa, mescos cu na 2016.

E morocho Ruano-Moreno tin 27 titulo mundial acumula entre nan y Sarah-Quita tin 14, unda e aña aki el a titula campeon mundial den freestyle y slalom y un tercer lugar den ola ariba ranking mundial.

 

Un temporada di competencia exitoso den 3 disciplina sumamente diferente.

Poco ta e regatistanan cu ta domina 3 disciplina varia y ta figura den top di ranking mundial.

Tiki ta e atletanan cu tin 14 titulo mundial acumula na edad di 26 aña cu un formacion universitario.

 

Pronto por vota pa elegi e “navegante” di 2017.

Sarah-Quita a keda nomina entre 80 regatista femenino y masculine, pa competi p’e titulo di “World Sailor of the Year” (WSOY) na Puerto Vallarta Mexico na november proximo.

Leave a Reply

Top