Rachel Kraaijvanger: Padu a inspira mi cu su humildad como artista y como persona

E conocido cantante y corista Rachel Kraaijvanger, mescos cu hopi otro artista local, ta contento cu inauguracion di Plaza Padu diabierna awo 17 di maart. Kraaijvanger a expresa su satisfaccion pasobra ta un merecido homenahe pa un di e figuranan mas grandi e importante di nos historia y cultura. Rachel a comparti na ki manera e ta sinti cu Padu a inspir’e.

“Como persona y como artista, e ta keda mustra e humildad cu e sa di unda el a bin y unda el a nace”, asina Kraaijvanger a expresa.

 

Manera hopi di nos, Rachel a tende di Padu del Caribe, pa prome biaha, na scol. Aki el a siña cu e ta un di e compositornan di nos himno nacional ‘Aruba Dushi Tera’ hunto cu Rufo Wever y Lio Booi. Tambe cu Padu a traha hopi otro cancion bon conoci y gusta.

Pero ta ora el a cuminsa canta y siña canta Padu su cancionnan, e ta sinti cu di berdad el a conoce e gran artista aki miho. Loke mas a resalta ta e contraste di humildad y profundidad den su letra; un combinacion cu semper a sa di toca tur Arubiano.

 

Mas despues, e nomber den buki a bira un persona di carni y weso ora cu Rachel tabata canta cu Maybelline Croes den conciertonan caminda Padu Lampe tambe tabata presenta of tabata haya homenahe. Tambe tabatin ocasionnan special caminda tabata compaña otro artistanan pa bay duna Padu un serenata na su cas. Y aunke nunca nan a traha profesionalmente, Rachel ta duna tur e momentonan aki un gran balor.

 

Kraaijvanger ta sumamente contento cu Gobierno di Aruba tabatin e vision y boluntad pa construi un plasa na honor di e gran Arubiano aki hunto cu e co-compositornan di nos himno. “Mi ta kere cu nos mester duna balor na nos artista, den cualkier ramo cu ta; of e hendenan cu ta haci algo bon na bo pais. Homenahea nan na bida pasobra, ora nan fayece, mi ta kere ta laat; y no tin nada mas bunita pa e persona mes cu sinti cu el a haci algo bunita, cu e ta laga un bon trabou atras y e ta wordo aprecia pa esey. Ta na bida so no por hacie”, e cantante a finalisa bisando.

 

Pueblo di Aruba henter ta keda cordialmente invita pa asisti na e momento historico cu lo bira e inauguracion oficial di Plaza Padu. Diabierna awo 17 di maart for di 6’or di atardi na e plasa ubica patras di edificio di Gobierno den Centro Historico y di Gobernacion na Oranjestad. Despues di e ceremonia caminda Padu Lampe mes lo ta presenta, ta sigui un concierto riba Plaza Daniel Leo cu un cantidad di artista dirigi pa Jonathan Thiel.

Top