Ramon Todd Dandare lo ser reconoci pa su trayectoria y logronan

Durante e competencia di Arte di Palabra na Cas di Cultura, dos persona lo ser reconoci durante di e mirando nan trayectoria y logronan.

E aña aki, Comision Arte di Palabra Aruba, a propone pa duna reconocemento na un persona cu a aporta grandemente na e desaroyo di nos idioma materno Papiamento.

Considerando e curiculo extenso di e persona rib’e tereno aki, a tuma e decision di nombra Mag. Ling. sr. Ramon Todd Dandare pa aña 2017.

 

Ramon Todd Dandare a nace na Colombia na 1942 y a establece na Aruba na 1952.

Na 1969, el a slaag pa Spaño M.O. na Universidad di Amsterdam. El a duna les na Colegio Arubano, na curso di L.O. na Aruba y di M.O.-A na Corsou.

Na Universidad del Valle na Cali (Colombia) el a obtene su Grado di Magister den Linguistica na 1975. Di 1976 te 2002, el a traha na Instituto di Lenga Arubano, cu te 1985 a forma parti di Instituto Lingwístiko Antiano.

 

Fo’i 1967 e ta lucha pa Papiamento su reconocemento como Lenga Nacional di Aruba, Boneiro y Corsou. Continuamente e ta presenta charla y publica estudio tocante Papiamento y a participa na numeroso conferencia tocante idioma. El a dirigi curso di Papiamento di Di Tres y di Di Dos Grado na Instituto Pedagogico Arubano y ta docente di Fonologia y Gramatica.

 

Na Facultad General di Universidad di Corsou e ta docente di Lingüistica. El a forma parti di Comision di Standarisacion di Papiamento y di Comision di Ortografia di Aruba, como tambe di e Grupo di Gramatica di Papiamento y di e metodo di Papiamento “Mosaiko/Cristal” pa Enseñansa Secundario.

Leave a Reply

Top