Raport di AIB presenta na Conseho di Minister : Apertura di CITGO ta trece un impacto economico grandi den nos economia

Riba peticion di Gobierno di Aruba, Aruba Invest Bank (AIB) a haci un analisis riba e contribucion di reapertura di e refineria den nos economia.

“E resultadonan ta confirma e analisisnan preliminar di Gobierno,” Minister Richard Arends encarga cu Asunto Economico a declara na final di e presentacion.

 

“Nos ta papiando aki di un aporte di mas cu Afl 340 miyon na nos economia, entre Afl 180 cu Afl 200 miyon na finanza publico y reactivacion di 3.1% di nos forza laboral.”

 Pa 2017 ta proyecta cu e contribucion di e reapartura di CITGO na nos economia lo ta alrededor di Afl. 280 miyon, esaki ta 5.8% di nos GDP.

Dor di inversionan planea dor di CITGO, e efecto economico ta hopi grandi den e luna y añanan nos dilanti.

“E contribucion aki ta aumenta pa 6.6% na 2018 y 6.0% na 2019, te ora cu alcanza e porcentahe di 7.1% durante e prome aña di operacion na 2020,” Minister Arends ta splica a base di e raport.

 

E contribucion na nos economia ta consisti di entrada pa Gobierno den forma di impuesto y prima, empleo y aumento den consumo y inversion den sector priva.

E estudio di AIB ta asumi cu salario cu e refineria y contratistanan lo paga na nan empleadonan local lo wordo gasta den e economia local principalmente.

Ta calcula cu e efecto di esaki pa nos GDP den 2017 lo ta alrededor Afl. 44 miyon.

Tambe ta premira otro sectornan cu lo brinda nan servicio n’e refineria ta contribui cu un total di Afl 80 miyon na nos economia.

 

“Remarcabel t’e hecho cu e contribucion di e reapertura di e refineria ta genera mas entrada cu a ser presupuesta pa aña 2017. Realizacion di esaki lo reduci e presionan presupuestario enormemente,” segun Minister Richard Arends.

 Na aña 2006 a haci un estudio similar pa Valero. Den contexto di e economia di 2006, e aporte di e refineria tabata 12.4%.  Mientras cu e analisis di aña 2006 tabata tene na cuenta un refineria den operacion cu un nivel hopi halto di detayenan comercial, e estudio recien a usa dato y informacionnan preliminar.

Contribucion di turismo actualmente compara cu 10 aña pasa ta cambia e composicion di bo economia.

 

“E analisis aki ta duna mas substancia n’e empeño di Gabinete Mike Eman II pa haci e reapertura di e refineria posibel, como tambe e perseverancia di mi colega Mike de Meza y di Prome Minister Mike Eman cu a sa di logra esaki den liña di maneho energetico y ambiental di Gobierno,” Minister Richard Arends – kende e tempo ey a lidera e negociacionnan cu CITGO — a conclui bisando.

 

 

Leave a Reply

Top