Raport di CAft ta papia palabra cla: Aruba ta cumpli debidamente cu normanan financiero di CAft

E ‘College Aruba financieel toezicht (CAft)’ ta satisfecho cu e argumentacion di pais Aruba pa loke ta presupuesto 2017 y ta haya cu e presupuesto ya no mester wordo adapta.

Bisando esaki  Presidente di Caft, Age Bakker a papia palabra cla y ta notifica Gobierno di e ponencia aki den un carta amplio.

 

E carta ta cuminsa cu un conclusion masha cla: “CAft ta di opinion cu e argumentacion adicional cu Aruba a duna ta bastante pa cumpli cu e norma di e presupuesto 2017 di articulo 14 lid 2 LAft cu ta indica cu e deficit di e sector colectivo na 2017 ta maximal 0,5% di e BBP (Bruto Binnenlands Product).

Esaki ta nifica cu Aruba por refinancia debenan existente y sera otronan si mester manera poni den presupuesto 2017.

 

Luna pasa CAft a manda Minister Angel Bermudez di Finanza un carta masha critico den cual e colegio a haci e pregunta cardinal con realistico e presupuesto 2017 ta y a pidi pa mas argumentacion di e cifranan entrega.

CAft, contra su propio regla y normanan a publica e carta aki riba nan website.

Minister Angel Bermudez na un forma trankilo a laga e ola di critica pasa bay y a formula su contesta pa CAft.

E colegio a haya e contenido di e carta satisfactorio y a hala aden su conseho pa baha e presupuesto cu 40 miyon florin.

 

CAft a pidi un aclaracion encuanto aumento di e entradanan presupuesta di Loonbelasting y BBO.

Minister Bermudez a constesta CAft den un carta amplio y esaki a cay den bon tera cerca CAft.

E Colegio a expresa su aprecio p’e contesta di Bermudez.

CAft: “Cu e argumentacion aki a keda comproba cu e entradanan presupuesta berdaderamente ta bay wordo realisa. E entradanan extra cu Aruba ta bay haya segun CAft ta mustra riba e medidanan cu Departamento di Belasting ta tuma pa percura pa cada persona cu mester paga belasting cumpli cu esaki tambe, loke ta su deber fiscal.

 

CAft tabatin pregunta tambe riba e sector colectivo cu banda di Gobierno ta consisti di e fondonan social, ATA y AZV.

“Despues di a traha riba e rebaho di 15 miyon di landsbijdrage como consecuencia di reapertura di e refineria, e cifranan ta klop cu esnan di presupuesto di 2017.

SVb ta mustra un surplus di 6,8 miyon dolar y presupuesto di  ATA un di 1,7 miyon dolar. Cu esaki e deficit di AZV ta wordo cubri y e perspectiva ta na 2017 e sector colectivo inclusivo pais Aruba, no lo conoce un deficit.”

 

Top