Raport di ILT di Hulanda ta mustra cu Problemanan na InselAir Aruba a cuminsa wordo señala mas cu 2 aña pasa caba

Pa “Inspectie Leefomgeving en Transport”(ILT), e problemanan cu a surgi na InselAir ta parce di ta basa riba un maneho dejado, tanto cerca e compania di aviacion mes como cerca Departamento di Aviacion Civil, cu mester a actua mas tempran of mester a haci controlnan mas estricto, profundo y documenta.

Na final no tabata por otro cu pone un prohibicion di buelo pa ambos flota cu e compania di aviacion ta dispone di dje: MD-80 y Fokker 70.

Hulanda tambe a prohibi su funcionarionan pa bula cu InselAir.

 

Na momento cu e delegacion di ILT tabata na Aruba, nan a combersa cu funcionarionan di DAC kendenan a splica cu nan a reuni cu gerencia di InselAir Aruba riba e causanan di tur e problemanan tecnico cu nan a bin ta experenciando.

Na opinion di DAC, esakinan ta: Mantencion inadecuado di avionnan; e hecho cu no a ehecuta un modificacion cu a wordo conseha dor di fabricante di e avion y e hecho cu nan tin poco di bisa den e uzo di e recursonan (avionnan).

 

Pa InselAir por cuminsa uza e avionnan, DAC a pone algun condicion cu nan mester cumpli cu nan. InselAir Aruba ta laga su avionnan wordo manteni dor di e seccion di mantencion di InselAir International na Corsou, cu no ta funciona debidamente.

A duna nan un luna di tempo pa haci e mantencion of busca un otro compania pa haci e trabou pa nan.

Den un otro inspeccion cu DAC a haci no a descubri deficiencianan severo den otro partinan di e empresa di InselAir Aruba, manera estudio di pilotonan, ehecucion di buelonan, of aplicacion di areglonan di trabou y descanso.

 

Pero ILT ta bisa cu e supervision riba operacion di e avionnan ta wordo parcialmente haci dor di DAC pa cual motibo e deficiencianan no a wordo señala.

Y remarcable tambe ta cu mayoria di e problema descubri dor di DAC dor di e inspeccionnan tin di haber cu e aspecto tecnico.

Den e raport tambe ta wordo menciona cu banda di e aspecto di seguridad di buelo, ta hunga un rol tambe e interes di Aruba den tur e evaluacionnan ora di tuma un decision.

 

“Transporte aereo pa y for di e isla ta importante pa turismo y p’e poblacion local, y decisionnan di DAC lo por tin un efecto directo y negativo  riba esakinan.”

Pero na mesun momento nan ta core bisa cu no tin indicacion cu DAC no ta completamente neutral, pero cu si por papia di un relacion cordial y di interes cu companianan di aviacion.

Durante un bishita di e delegacion na InselAir Aruba a constata cu no solamente den mantencion di avionnan tin riesgo di seguridad, pero tambe den operacion di e buelonan.

 

Nan ta menciona e maneho di documentonan, follow-up cu descubrimentonan di cosnan interno y estudio di pilotonan.

For di e sistema di calidad y relato di gerencia ta resulta cu e problemanan aki ta mas cu 2 aña conoci serca gerencia, pero nunca a percura pa un solucion adecuado.

Pero mas remarcabel ta cu e problemanan aki nunca a wordo señala dor di DAC y cu e departamento aki a tuma un decision den un fase hopi laat.

 

Den e sentido aki nan ta bisa cu e sistema di supervision no ta suficientemente bon. Durante e bishitanan na InselAir, DAC a informa cu lo no permiti nan bula te ora cu nan haya un recertificacion.

Ta basa riba tur e problemanan na InselAir Aruba y e sistema di control un poco deficiente di DAC a dicidi cu lo firma un protocol di cooperacion cu Hulanda pa yuda pone e departamento aki al dia.

Top