Raport nobo ta bisa cu Mitch Henriquez a fayece di un paro cardiaco

E caso a keda posponi te cu proximo aviso

 

DEN HAAG – Un raport forensico nobo a trece duda den e causa di morto di Mitch Henriquez den 2015. Segun e raport, Henriquez no a fayece a causa di un nekklem haci pa un di e agentenan, sino di un paro cardiaco.

 

Corte a dicidi pa pospone e caso penal contra e dos agentenan. E raport forensico a ser pidi dor di e abogadonan di e agentenan. Segun Corte, e raport a ser entrega dos siman prome cu e prome tratamento di e caso.

Corte a anuncia dialuna cu e causa di morto lo ta mas probabel un paro cardiaco. E conseheronan di e agentenan no tabata prepara dialuna pa presenta e raport alternativo.

 

Anteriormente, basa riba investigacion haci pa e Nederlands Forensisch Instituut (NFI), Ministerio Publico a conclui cu Mitch Henriquez a fayece a causa di maltrato rond di su neck.

Heridanan na su nanishi y e uzo di “pepperspray” tambe lo tabata e causa.

Di acuerdo cu Ministerio Publico, un di e agentenan a haci e nekklem riba Henriquez, mientras e otro a herid’e riba su nanishi y uza e “pepperspray”.

 

E raport nobo a ser haci dor di un doctor forensico, pero Corte ta pidi pa scucha opinion di un patologo y un otro doctor forensico p’asina analisa e contenido di e raport.

E caso mester a tuma luga 6 di april proximo. Rib’e dia aki lo tuma luga e ora un sesion pro forma pa discuti tocante e raport nobo.

Top