Rapport riba chocamento di Henriquez a wordo hinca den e dossier

Un noticia cu a drenta ayera, un poco alentador ta cu Hues a dicidi di agrega na e dossier di e caso penal contra Polis acusa di a maltrata y causa morto di Mitch Henriquez, un rapport cu ta  bisa cu el a muri door cu el a wordo choca.

Ta trata di un rapport di un profesor Belgo, kende ta bisa cu e Arubiano di 42 aña a stik muri. E caso aki a tuma luga na juni, 2015 na momento di su detencion.

E coordinador medico di medicina hudicial di Universidad di Antwerpen, Werner Jacobs, a wordo aserca door di Abogado di e famianan, esta Richard Korver. Korver a confirma na prensa Hulanda (e website nu.nl), cu e persona aki a base di imagennan di e detencion cu a wordo analisa a conclui cu Henriquez a fayece door cu el a stik.

“Su raportahe ta mescos cu e conclusion di e expertonan di NFL, sra. Vidija Soerdjbalie,” segun Korver ta bisa. Jacobs, segun e Abogado ta bisa, ta comparti e opinion di Soerdjbalie cu por papia di e sindroma agudo di stress como causa di morto, si no tin ningun motibo pa e fayecimento. “Esaki no ta e hecho den e caso aki.”

Soerdjbalie dia 14 di november den e audiencia a bisa cu e ta keda para ariba cu e causa di morto ta un consecuencia di e presion grandi haci na garganta di e victima. Tres otro experto, entre nan e dokter forensico Daan Botter di NFL y kees Das di GGD, ta bisa cu Henriquez a fayece a causa di un paro cardiaco causa door di e sindroma agudo di stress.

Causa di morto

E causa di morto di Henriquez ta hunga un rol masha importante den e caso aki. Henriquez durante su aresto a wordo gedal den su cara y na su heup y a uza “nekklem” riba dje. Ministerio Publico a bisa dialuna ultimo cu nan ta Sali for di e punto di bista cu e homber a fayece a causa di e sindroma agudo di stress. Pesey na opinion di OM no tin un conexion entre e fayecimento di Henriquez y e actonan di violencia di e Polisnan. Pesey tambe a bisa cu pa OM e Polisnan ta culpabel di maltrato, pero no a exigi castigo.

Diaranson e defensa di e Polisnan tabata na turno pa trece nan ponencianan dilanti. Nan a bisa cu e violencia uza tabata legal y a pidi pa “vrijspraak”.

E rapport en cuestion no a wordo admiti mesora door di Corte. Hues a bisa cu diamars y diaranson el a haya diferente email  di Korver cu e peticion pa  agrega e documentonan aki na e dossier. Pero como cu Korver a dicidi pa no ta presente mas, Hues inicialmente a nenga pa agrega esakinan.

Manera por corda, riba diahuebs 16 di november Abogado Korver hunto cu mama y e rumannan muhe di Henriquez a bandina sala como protesta. Nan a bisa cu nan no tin confiansa den e desaroyo husto di e caso.

“Sr. Korver mes a bisa cu su salida lo tin consecuencia y cu nan rol den e proceso a finalisa di e forma ey,” segun a wordo bisa diaranson mainta door di Du Pon, presidente di Corte. Corte a bisa tambe cu esey tabata e final y cu nan lo no agrega eventual otro documento mas.

Pero un rato despues el a hala atras y a dicidi di agrega e rapport di Jacobs den e dossier. Fiscal tambe a bisa cu den cuadro di un investigacion profundo  e contenido wordo agrega. Cu esaki e no a duna mucho balor na e rapport.

Corte a keda di studia e documentonan diaranson anochi y bolbe bek riba esakinan diahuebs. E chens ta grandi cu Hues lo bisa solamente cu e lo tene cuenta cu e dossier so den su evaluacion.

Huez tambe a bisa cu Korver a manda email tambe pidiendo pa duna un splicacion diahuebs riba contenido di e rapport, “pero cu miho e spaar su tempo” pasobra e lo no wordo admiti. Korver mesora a reaccion bisando cu el a tuma nota di e remarca di Corte, pero cu e lo pensa si toch e lo presenta.

Dia 21 di december awor tin sentencia den e caso.

Leave a Reply

Top