Raymond Gradus, Presidente di CAft: Na 2018 mester dal un prome stap den direccion di un surplus presupuestario structural cu un surplus di 0,5% di e PIB

Segun Presidente di CAft, Raymond Gradus ayera tardi den un conferencia di prensa, alcansa e normanan di presupuesto ta importante pa reduci debe publico. E carga masivo di debe ta eherce hopi presion riba finansa publico di Aruba.

Pa motibo di e carga di debe halto combina cu tasanan di interes relativamente halto e carganan di interes anual ta un partida di gasto masha halto pa Gobierno di Aruba.

 

Ta importante pa Aruba pa baha tanto e carganan di interes como e cuota di debe. E bononan di Gobierno refinancia na 2017 ta un paso den e bon direccion p’esey, ya cu a sera esakinan na un tasa di interes mas abou.

Pero bahamento mas aya di e cuota di debe y carganan di interes mas abou asocia cune ta necesario pa hiba finansa publico na un caminda structuralmente sostenibel.

 

Na 2018 mester dal un prome stap den direccion di un surplus presupuestario structural cu un surplus di 0,5% di e PIB.

Incluso despues di 2018 un surplus ta necesario pa realisa un mehoramento mas aleu di debe publico, segun e vocero di CAft.

 

NORMA DI DEFICIT ALCANSA NA 2016

A base di e proyecto di cuenta anual CAft ta conclui cu na 2016 -cu un deficit di 1,8% di e PIB- a cumpli cu e norma di deficit legal di 2,0% di e PIB.

E proyecto di cuenta anual ainda ta na Controlaria General di Aruba pa su conseho. Posteriormente CAft lo emiti un conseho tocante e cuenta anual.

 

Riba e cuenta anual aki no a aplica ainda e control di accountant. Aruba ta stipulando un trayecto pa den futuro yega na un control di accountant di e cuenta anual.

E trayecto aki lo mester conduci na cu lo por otorga e cuenta anual di 2020 un certificacion (aprobatorio) di accountant.

CAft ta enfatisa e importancia di un cuenta anual controla pa un accountant.

 

 

Leave a Reply

Top