RBC Royal Bank ta lansa RBC Car Show 2017

Durante un conferencia di prensa djabierna 17 di maart RBC Royal Bank a anuncia su Car Show  2017. E evento lo tuma lugar diasabra dia 1 di april den e parking lot di Compleho Deportivo Frans Figaroa. Tur car dealer y algun motor dealers lo ta presente durante e evento y algun di nan ta bay presenta nan ultimo modelnan di auto.

 

“Conhuntamente cu tur car dealers na Aruba nos ta organisa un biaha mas un evento social pa henter famia. Nos ta haña sumamente importante pa duna balor na nos cliente y pa yuda realisa nan soño.

Durante e Car Show nos ta ofrece un tremendo oferta cu ta ensera te cu 100% financiamento riba prestamo pa auto nobo cu interes reduci.

Ademas lo tin descuentonan special riba algun modelo di auto y chens pa gana algun premio,” asina sra. Joanaila Geerman-Lacle, RBC Branch Manager di Sasaki Branch a splica.

 

Geerman-Lacle a sigui bisa: “Cu e setup di e car show, RBC ke duna su aporte n’e car dealers y tambe na su clientenan. Durante e evento tambe lo tin profesionals di RBC cu por presenta e interesadonan cu diferente posibilidat pa un fianza di auto y e termino di pago.

Pa haya “pre-approval” pa un fianza, clientenan por pasa na un di RBC su branchnan of yama e Contact Center di RBC na 588-0101. Mester trece dos ID valido, dos ultimo payslips si ta cobra pa luna, cuatro ultimo payslips si ta cobra pa quincena y carta di referencia di trabou”.

 

E evento ta bira un fiesta grandi pa henter famia. Muchanan por diberti nan mes cu e show di DinoJump, tin ambiente musical, cuminda y bebida di cual tur entrada ta bay pa Scouting Aruba. E RBC Car Show 2017 ta habri pa publico di 5’or di atardi pa 9’or di anochi.

Top