Reconocemento na Amigonan di Santa Rosa

Durante di nos exitoso mercado, manera nos a menciona den un relato prome, nos a haci un reconocemento na esnan cu pa varios aña caba a contribui cu nos mercado.

Un parti special cu un dedicacion na nos “Amigonan di Santa Rosa” den presencia di nos directora di Santa Rosa sra. Nathalie Maudro y Minister di Infrastructura sr. Benny Sevinger cu tabata presente representando Prome Minister sr. Mike Eman debi na un kebrante di salud.

 

Nan a haci entrega di e reconocementonan aki, cual un di nan tabata hopi special debi cu semper e persona aki a contribui grandemente cu nos mercado pa varios aña.

Sigur tabata na su lugar pa nos por a reconoce y duna honor na un señora cu no t’ey mas entre nos y cu sigur nos lo keda cu grato recuerdo.

Nos ta papiando aki di sra. Bertha Croes-Maduro, den feliz memoria, cu semper tabata bon conoci pa su remedinan di tera. Awor e yiu homber a tuma esaki na su encargo pa por sigui traha e remedinan di tera aki.

 

E yiu homber sr. Lucio Croes cu tabata presente a ricibi e reconocemento aki na nomber di su kerida mama. Sigur tabata un momento hopi special nos solamente di nos parti pero tambe pa e yiu homber. Sra. Bertha Croes Maduro semper for di comienso di nos mercado tabata presente ofreciendo su remedinan di tera.

Semper sra. Bertha Croes-Maduro tabata haci esaki cu pasion p’asina su clientela ta bon informa y sigur semper ta brinda cosehonan cua ta e remedinan di tera cu mester wordo tuma y na ki momento esaki ta beneficia bo salud.

 

Na e momento ey tambe nos a reconoce nos otro “Amigonan di Santa Rosa” cu tabata den persona di:

Sra. Rosa Alberto, bon conoci pa su stroopinan di Ginger;

Sra. Naőmi Landgraf pa su obranan di man di carnan Tipico Arubano;

Sra. Maria De Freitas, kende semper tin su matanan bon y bunita;

Sr. Mario Beata tambe ta ofrece matanan ornamental;

Sra. Iris Offerman, bon conoci pa su cuminda crioyo cu ta Cabez cu Higra y otro platonan crioyo;

Sra. Margarita Dirksz pa su Sevichi di Pisca y BBQ;

Sra. Marelva Thode pa su Jhonny Cake cu Bacalao;

Sra. Bellanidia y sr. Alipio Jimenez, kedenan semper ta den nos mercado cu nan Cocada, Delce de Leche, Awa di Coco y diferente cos dushi;

Sr. Betto Farro, kende pa su Awa di Coco y Raspao;

Sr. Samuel Lopez, kende ta traha liquernan di Casho;

Sra. Shirley Illidge, kende tambe ta produci diferente sabor di Biña local;

Sra. Angel y sr. Howell Scholten, conoci pa pasabocanan specialmente pa mucha.

 

Un palabra di gratitud y felicitacion na tur nos “Amigonan di Santa Rosa” cu a wordo reconoci y un danki di curason pa semper a contribucion grandi na nos Mercado Santa Rosa.

Top