Record nobo pa CITGO Aruba Refinery

CITGO Aruba Refinery ta contento di por anuncia cu durante luna di april 2017 nan Departamento Marino y di Operacion a encarga di procesa un cantidad record di 42 barco cu a drenta y sali di nos haf.

For di 2013 e cantidad di barco cu ta haci uso di nan servicio di terminal a bin ta subi, pero e luna di april 2017 ta un luna record no solamente p’e 42 barco cu nan a encarga di dje, pero tambe nan tabatin un suma di casi 10 miyon bari di petroleo cu a pasa den nan area di terminal.

 

Esaki kiermen cu durante luna di april nan empleadonan marino como tambe nan operadornan a percura pa move na un manera sigur e barinan di petroleo cu ta bin cu e barconan pa nan tankinan y tambe bek p’e barconan.

Esaki ta un logro grandi den e mesun dinamismo di nos hendenan cu ta trahando incansabel riba e rehabilitacion di e refineria.

 

Segun vocero di CITGO, “nos empleadonan y contratistanan ta dedica n’e proyecto y tur cos ta canando segun e plan inicial caminda aworaki nos ta den e fase di inspeccion y definicion exacto di trabounan necesario cu start-up di e refinería den di dos mitar di 2018.

Mientras nos ta den e fase aki ya caba empleado y contratistanan a mobilisa y a cuminsa ehecuta e evaluacion y ingenieria detaya cu mester tuma lugar riba e unidadnan di e refineria como parti di e rehabilitacion.

 

Ademas di esaki ya caba departamentonan encarga ta cumprando e materialnan necesario p’e fase aki di e proyecto. Nos focus primordial n’e momentonan aki ta pa planea y ehecuta e proyecto na un manera sigur y eficiente”.

CITGO, cu oficina principal na Houston, ta refina, transporta y mercadea combustibel di transporte, lubricante, producto petrochemico y otro producto industrial.

E compania su doño ta CITGO Holding, Inc., un subsidiario indirecto cu doño principal Petróleos de Venezuela, S.A., e compania nacional di petroleo di e Republica Bolivariana di Venezuela. Pa mas informacion bishita www.citgo.com.

 

 

Top