Red Machine ta pica dilanti den Playoff Double AA

E prome partido pa loke ta trata Pool B di e playoff final di Campeonato Double AA organisa pa ABBA tambe a tuma lugar den fin di siman. E dos ekiponan cu a logra yega na e playoff aki ta Red Machine y Rockets Freezone

 

Red Machine ta logra bay cas cu un victoria den un wega basta preta di 5-3. Rockets Freezone ta purba bin bek den di 9 inning pero no ta logra di anota mas di un careda y asina e wega ta terminda cu un victoria pa Red Machine.

 

Un total di 5 careda, 9 hit, 8 coredo lagan a base y 2 error pa Red Machine mientras Rockets Freezone tabatin un total di 3 careda, 2 hit, 8 coredo laga na base y cu un total di 6 error, cual sigur a haci un diferencia den e wega.

Miho bateadornan pa Red Machine tabata Darwin Escobar, Christopher Williams y Julio Hernandez kende nan a bay cu 2 hit den 4 turno y pa Rockets Freezone, Danilo Croes y Leander Angela cada un cu un hit.

Pitcher ganador Nathan Berkel, kende por cierto tambe a keda como “Player of the Game” pa loke ta e prome wega playoff final di Pool B. Pitcher perdedor tabata Ramon Gonzalez.

 

E weganan playoff pa loke ta Pool B ta como lo siguiente: Diamars 21 di maart, pa 19:45 na Nadi Croes / Crismo Angela Ballpark, Diabierna 24 di maart, pa 19:45 na Nadi Croes / Crismo Angela Ballpark y si tin mester lo bay 2 extra fecha cual nan ta diasabra 25 di maart, pa 19:45 na Joe Laveist Ballpark y e wega final di e playoff Pool A lo ta diamars, 28 di maart, pa 19:45 na Nadi Croes / Crismo Angela Ballpark. Atrobe, e ultimo dos partidonan aki ta unicamente si ta necesario.

 

Nos kier a invita tur fanaticada di baseball pa yega y apoya nos talentonan local. Tambe nos kier a duna un danki na nos sponsor Tropical Bottling kende a bira nos patrocinador pa loke ta e final di Campeonato Double AA – ABBA.

Leave a Reply

Top