Red Skull, Emilio Gonzalez y Stefano Alcantara presente n’e prome lustro di Aruba’s Tattoo Convention

Ryan Tromp di Inkspiration Tattoo Studio ta organisando e di 5 edicion di Aruba’s Tattoo Convention. Artistanan di rond mundo y local lo ta presente pa demostra nan habilidad di tatuahe.

E evento riba su mes a crece tur aña tanto na bishitante como n’e ambiente relahente hunto cu e artistanan presente. E convention lo tuma lugar dianan 1 y 2 di April den e ballroom di Hilton Hotel Aruba. E arte di tatuahe ta existi na Aruba pa mas di un siglo.

Si antes tabata prik cu cadushi y mas bien navegantenan tabata usa tatuahe, awendia artistanan ta usa mashinnan masha sofistica y tatuahe a bira un lifestyle. E taboo cu tabata existi riba tatuahe a cambia di tal forma cu teenager te adulto ta poniendo tatuahe. Tony Tromp, Silvio Bufalini, Greg Oehlers y Rachel Peterson lo ta entre e artistanan di tatuahe.

E piercernan Darrel Werleman di Inkspiration y Greg Tromp di Black Sheep tambe lo ta presente. Banda di e artistanan Rubiano tin un serie di artista internacional procedente di entre otro Portugal, Venezuela, Colombia, Costa Rica y Corsou. E aña aki lo bin como “Guest Artist” Stefano Alcantara di Peru. “Comic books” a influencia Stefano pa cuminsa pinta for di tempo e tabata un mucha. Su amor pa dibuha a transforma den entre otro airbrush, y pintamento cu charcoal, acrylics y azeta.

Cu 18 aña el a sera conoci cu e mundo di tatuahe despues di a mira su prome revista di tatuahe. Su fascinacion cu e arte di tatuahe a bira su profesion cu a conduci na habri Stefano´s Tattoo Studio na 1999. Actualmente Stefano tin 4 tienda di tatuahe, 3 na Lima, Peru y un na Fort Lauderdale, Florida. Dos “Special Artist” lo participa n’e convention e aña aki.

Emilio Gonzalez di Venezuela kende tin 85% di su curpa tatua y su lenga ta parti manera di un colebra lo ta bek después di 5 aña. Emilio tin mas di 20 aña di experiencia den “extreme body modification”. E ta ser considera un di e artistanan di modificación mas reconoci y respeta mundialmente. E otro ta Henry Rodriguez mihor conoci como “Red Skull”.

Red Skull t’e persona cu mas modificación di curpa na Venezuela. Su obsesion riba Capitán América a haci cu e tabata kier a modifica su curpa p’e parce e “villano” cara cora. El a pone implants na su frenta, tatua su cara cora y a corta su nanishi p’asina parce su ídolo mas hopi posibel.

Durante e convention lo tin un biaha mas un show di suspension dirigi pa Darryl Werleman y su team. Na e show aki tur presente cu ta desea por participa. Tambe lo tin musica en vivo. Nos ta recomenda tur amante di tatuahe y pueblo en general pa bishita e di 5 Aruba’s Tattoo Convention” organisa pa Inkspiration Aruba y “Get Inked” dor di un di e artistanan cu lo ta presente. E evento lo tuma lugar na Aruba Hilton Hotel cuminsando pa 12or di merdia. Nos ta topa…

 

 

Top