Registracion di un marca na Oficina di Propiedad Intelectual

Esaki ta e siman cu Oficina di Propiedad Intelectual di Aruba ta celebra su 30 Aniversario. Diabierna dia 17 di november 2017 ta conmemora e fecha cu un “Open Dag” for di 9’or di mainta te cu 4’or di atardi y comunidad di Aruba ta cordialmente invita pa pasa y haya tur informacion riba Derecho di Autor (Copyrights), Invento (Patent) y Marca (Trademarks). E dia tambe lo tin presencia di AMAA, cu ta e Asociacion di Musico y Artista Arubano.

OPI ta duna varios servicio na publico. Y un di nan ta registracion di Marca. Kico ta Marca?

Marca ta e nomber di un producto por ehempel: SONY, HARLEY DAVIDSON, COCA-COLA, BLOKKI THIEL, GISELLE DEPARTMENT STORE, BRIGHT BAKERY, of un servicio special cu un compania ta duna, por ehempel Setar N.V. tin e servicio di ‘Setarnet’ y Digicel tin e servicio di ‘Aruba Top Up’.

Hopi compania y organisacion na Aruba tin un logo pa nan marca pa e compania ta reconocibel, p’asina e por distingui su mes for di un otro compania, por ehempel: Bon Bini Cargo, tin como logo, e solo oranje cu blauw, De Palm Tours, tin su mata di coco, cu e solo cu e colornan geel y preto. Colegio Arubano tin su logo blauw cu blanco, cu ta representa e mucha cu ta studia bou di e palo di watapana.

Tambe tin varios compania cu tin slogan, entre otro Setar N.V. tin “Setar Di Bo Tambe” y “Creando Conexion”. Palais Hindu tin: “Bon Prijs Tur Dia”. Ennia tin: “Celebra Bida” y “Sinti Bo Sigur” y WEMA tin: “Nos A Bin Pa Keda”.

Ta recomendabel pa proteha e nomber di negoshi si bo ta uza esaki como bo marca (Trademark). Pues, si bo kier pa publico reconoce bo na nomber di bo negoshi, por ehempel: Italo Arubano, Antraco, Kooyman, AMTR, Thiel Corporation, The Pastechi House etc.

Tur esaki nos ta yama na Ingles “Trademark” y na Papiamento MARCA. Generalmente ta papia di marca so, pero e ta encera tur nomber, palabra, cifra, logo, diseño di nomber, slogan y otro signonan, cu bo ta uza pa identifica y promove bo compania of producto.

Ta consehabel pa proteha bo marca contra e piratanan, cu ta djis para warda trankil manera “caiman na boc’i riu”, pa mira cua nomber, logo, slogan y marca ta pega y ta causa furor, p’asina nan tambe por haci uzo di esaki y asina ta desvia y confundi e consumidor.
Na un manera inhusto e pirata ta probecha y ta abusa, bibando riba custia di e bon nomber di bo negoshi, marca, logo of slogan. Te hasta su producto of servicio por ta di un calidad inferior. Ora e pirata ta trece esaki riba mercado, e ta confundi e consumidor, cu ta kere cu tur e asunto aki tin di haci cu bo negoshi . Ademas esaki ta un mal propaganda y sla duro pa bo negoshi.

Pa mas informacion tocante registracion di marca, Oficina di Propiedad Intelectual ta invitabo pa bishita nos oficina na Adriaan Lacle Boulevard 3, Oranjestad.

Leave a Reply

Top