Relaciona cu e disaster causa pa Irma na St. Maarten – Rey Willem Alexander ta na caminda pa bishita St. Maarten

Di acuerdo cu medionan Hulandes, Rey Willem Alexander ta sali diadomingo awor pa Corsou, acompaña pa Minister di Relacion Interior y di Relacion den Reino, Ronald Plasterk cu e meta pa bishita e islanan ariba, en especial St. Maarten, cu t’e isla cu mas daño a sufri.

Pa loke e por a mira, e situacion ta desvastador y e Rey y su señora Reina Maxima ta conbibi cu e pueblo di Islanan Riba.

Hulanda ta haci lo maximo pa yuda e islanan cu a sufri a consecuencia di orcan Irma. No sa ainda ki dia e Rey y su comitiva lo sali pa St. Maarten, y t’e intencion tambe pa bishita Saba y St. Eustatius tambe, maske e dos ultimonan aki no a sufri tanto daño manera St. Maarten.

 

Awor miembronan di Marina Hulandes a califica cu e situacion ta birando insigur na St. Maarten y no ta recomendable pa ningun hende bay nan so, o amenos cu seguridad. E hecho aki a pone cu hopi di nan a bay bek abordo di Zr. Ms. Zeeland, mientras cu Pelikaan si a bolbe Corsou.

Nan ta prefera pasada di orcan Jose, prome di sigui cu nan tareanan. E habitantenan di St. Maarten mes no sa mucho di orcan Jose, pa falta di comunicacion.

 

Mester admiti cu debi n’e bon preparacion, no a cay victima, segun vocero di Marina Real. E di dos orcan, esta Jose, por causa tog algun cambio.

Na St. Maarten actualmente no por garantiza orden, y consecuentemente Prome Minister Marlin a laga sa caba, cu e no por tin reunion di Conseho di Minister, debi cu no tin comunicacion. Varios t’e casnan di Polis cu tambe a keda destrui. Nan mes tin problema pa mantene orden y no por actua contra di hortamento cu tin.

 

Doñonan di varios negoshi a laga sa cu nan no tin nada mas di scapa y como tal a laga nan porta habri y laga e hendenan bay cu loke nan kier.

E poco Polisnan cu tin disponibel no por bay over na detencion di tur hende tampoco y a laga nan pa nan cuenta.

E pista di aterizahe ta habri, pero pa avionnan military solamente. No tin coriente y menos ainda fuel.

 

Asina p.e. tin varios periodista riba e isla, nan por traha nan noticianan, pero nan no por manda nada pa nan respectivo medionan, ya manera menciona no tin coriente riba henter e isla.

Pesey awor Aruba y Corsou ta manda nan hendenan pa yuda St. Maarten.

 

 

 

Top