Remigio Wever: E bobedadnan di siman den “nos” maneho riba tereno di turismo cu ta fayando totalmente

ABUSO DI PODER, MANIPULACION Y CORUPCION

E Ministernan Arthur Dowers y Mike de Meza a reda e asunto, y ta acusa e Minister di Turismo Otmar Oduber di manipulacion, corupcion, abuso di poder, y accionnan castigabel.

Si, bo ta lesa bon: mi ta menciona Minister di Turismo, y no ex-Minister di Turismo; Pakico?

Pa e simpel motibo cu ainda ta Otmar Oduber ta esun cu ta dicidi kico ta sosode rib’e tereno aki!

No laga ningun hende gañabo: “E Forsa Nobo Por” ta un appendix di AVP! Den idioma crioyo: nan ta come for di mesun tayo.

E acusacionnan di Dowers y De Meza ta bay tocante droga, e “Electric Festival”, 5 miyon florin, y fondonan cu scondi asina ta sali for di ATA bay pa e campaña di  eleccion di Otmar Oduber/POR.

Ay no, berdad ta cu Dowers y De Meza ta haci esaki djis pa crea e impresion cu AVP y POR tin pleito cu otro; pero esey no ta e caso at all: Husticia no ta bay haci nada cu e abuso di poder, ni cu e manipulacion, ni cu e corupcion di Otmar Oduber, absolutamente NADA!

Na manera di papia: nan a “shake hands” caba; AVP y POR kier forma den nan dos un Gobierno di coalicion despues di dia 22 di september proximo!

 

INSELAIR, TIARA AIR

Aruba Tourism Authority (ATA) a pone beslag riba e cuenta bancario di InselAir, esaki di acuerdo cu palabranan di su directora sra. Ronella Tjin Asjoe-Croes na prensa.

Pero, ta kico bo a haci anto: Tur e sosten financiero ey di ATA y AHATA na companianan chikito di aviacion stranhero, raro y straño, cu di mes mester a bula Venezuela pa aya bay busca e miles di e turistanan pa nan bin swipe na e ATM-nan di nos banconan, y esaki pasobra nan lo a bay haci un diferencia grandi rib’e estadisticanan di turismo di Aruba; …un comerciante chikito mes lo a compronde mesora cu Venezuela nunca lo a bay paga e cuentanan, esey nos tabata sa caba toch for di e noticianan den prensa encuanto American Airlines y tur e otro cantidadnan di victima!? Lo ta cu Otmar y Ronella no ta lesa corant? Awor mi ta compronde miho!

 

NINGUN MIEDO PA E COMPETENCIA DI UN CUBA DEN PLENO DESAROYO

Aki ta sigui algun declaracion di CEO di ATA, sra. Ronella Tjin Asjoe-Croes:

“Aruba no tin miedo di e desaroyo y competencia di Cuba. Nos ta fiha nos mes rib’e cantidad di turista di estadia, e entrada pa cada camber di hotel, e patronchi di gastamento dor di e bishitantenan, y e indice di felicidad.

(“Happiness Index”) di e poblacion, y despues rib’e turistanan cu tin mas pa gasta, calidad, cadenanan di hotel manera Ritz-Carltion y Hilton, playanan bunita y sigur”.

 

Aki mi no por keda sin mesora duna mi comentario: “Ki un non-sense y ki un disparate for di un “ivoren toren”.

Lagami splica: Ya ta bay 18 luna cu e cantidad di turista di estadia ta bahando; e entrada pa cada camber di hotel (“room revenue”) ta bahando, turistanan ta gastando menos, e berdadero y real “Happiness Index” di e poblacion ta bahando espantosamente, contrario na e “Happinness Index” di e brother Tico Croes; e mal calidad riba Aruba ta motibo serio pa inkietud, mescos cu e calidad di nos beachnan y nos lama; cadenanan di hotel manera Hilton, no tin ningun significacion mas den e temponan aki; awor ta nombernan manera Grand Vela, Royalton, Zoëtry, Kimpton, Sandals, of Banyan Tree, ta esunnan cu ta comanda den e industria aki; pero kico sra. Ronella por sa di esey?

 

Y por ultimo: Aruba ta ricibi e turistanan di acuerdo cu e producto hotelero, y nos oferta di hotel y nan cambernan na e turista. Y tanten cu nos NO por ofrece un producto hotelero di cinco strea manera Kimpton, Royalton, Grand Vela of Zoëtry, lo nos NO por yama bon bini na turistanan di cinco strea cu nan entradanan halto!

E producto hotelero di Aruba ta completamente anticua y di siglo pasa, nos playanan y nos lama ta susha totalmente, nos nivel di prijsnan ta ridiculamente halto, y e calidad cu nos ta ofrece ta demasiado abao. Miho sra. Ronella Tjin-Asjoe cuminsa preocupa su mes grandemente cu Cuba!

 

E HOTEL NOBO DI SANDALS NA ST. LUCIA

Mientras cu AVP y POR ta perde nan tempo cu konkelmento y batimento di man pa mas oro keda na mando den un coalicion nobo entre nan dos, y mientras cu e Ministernan aparentemente ta atendiendo nan propio asuntonan personal, abuso di poder, manipulacion, corupcion y nan weganan estupido entre Westin, RIU y Hilton, nos competencianan den turismo ta sigui nan caminda trankilo asina.

 

Wak p. e. e potret adhunto di un hotel fabuloso di seis strea cu Sandals ta traha na St. Lucia!

E hotel Sandals aki berdad por broma cu su 350 “swim-up” suites na nivel di suela, cu cada un su salida rib’e rio cu ta conduci pa e piscina; y for di e segundo pa e di cuatro piso suitenan cu nan asina yama “sky-pools”.

Rib’e potret na color lo bo por weita e partinan blauw rib’e di dos, di tres y di cuatro piso, cu ta e piscinanan instala net dilanti di bo camber! Mas bunita y mas luhoso, no por…y ta cu hotelnan asina Aruba mester competi, y fuera di esey cu p. e. un Hilton anticua y chapo?

 

Keda drumi dushi asina, Mike Eman, Otmar Oduber y Mike De Meza; Aruba di mes ta hundi bao di boso maneho desastroso. Sigui knoei numa.

Top