Remigio Wever: E crisis grandi den nos turismo (Parti 13)

 

Mientras cu Otmar Oduber, y e dos Mikenan, Eman y De Meza, a destrosa nos turismo, e industria aki ta sigui prospera y florece den henter resto di Caribe; ta na Aruba so esaki no ta e caso!

 

ATA AKI E GANADONAN:

Turismo pa Turks & Caicos, Belize, St. Lucia, Antigua y Barbuda, Jamaica, Republica Dominicana, e costa Caribense di Mexico y Cuba, tur ta desaroyando nan mes y ta floreciendo fantasticamente.

Con por ta otro si cerca nos competidornan aki inversionistanan ta construyendo e hotelnan di mas bunita y di mas fabuloso, y esaki den nan mayoria cu capital Spaño, Arabe, Chines y Mericano.

 

Durante e ultimo 10 añanan e producto hotelero a cambia substancialmente, y awendia TUR COS den cualkier hotel moderno ta hopi diferente, compara cu e producto hotelero di añanan 60 y 70 di siglo pasa (!!), manera esaki, pues e producto hotelero, tabata ser ofreci dor di cadenanan renombrá di e tempo ey, manera Holiday Inn, Hilton, Sheraton y InterContinental.

Realidad ta cu awor ya a pasa pa historia e cambernan minisculo di 28 meter cuadra, e tapijtnan vies, e “wall-to-wall carpeting” den e cambernan, e bañonan chikito cu un combinacion di ducha (douche) y bañera (badkuip).

 

Ya bo no ta weita mas e balconnan chikito, bashi y sin gracia, tampoco e pasiyonan smal y preta entre e cambernan, of e coffeeshopnan estupido y e restaurantnan “all-purpose” (restaurantnan chapo y ya for di moda, sirbiendo desayuno, almuerso y cena, y cu ainda lo bo topa na gran cantidad den nos hotelnan anticua, contrario na e hotelnan nobo y moderno, cu nan restaurantnan sirbiendo especialidadnan, manera un “bistro” cu su especialidadnan Frances; un restaurant “all-purpose” lo desea di ta tur cos pareu, pero no tin e capacidad at all pa esey), cu a lo mejor ta sirbi platonan hopi mediocre, acompaña ademas pa un servicio malo y poco amistoso. E areanan di recepcion (“lobby”) y e frontdesknan cu rijnan largo di espera, tambe ya a pasa pa historia.

 

E PRODUCTO HOTELERO NOBO Y MODERNO

E producto hotelero nobo, moderno, particularmente den e asina yama “resort-hotel”nan (hotel unda e huesped ta pasa su vacacion durante 1 of 2 siman, contrario na un hotel comercial), ta consisti entre otro di “jr. suites”, siendo e cambernan di mas chicito di 61 m2, y ademas e suite-nan regular mes, vilanan, pabeyonnan y condominionan estilo penthouse condo’s, tur cu nan propio facilidadnan di cushina, mobilario di camber “residencial” (mobilario cu ta inspira trankilidad manera cu lo bo kier tin e den bo propio hogar, cu colornan neutral, hopi gris, y en todo caso no tropical “bruto” manera antes un camber tabata wordo prepara cu colornan fel manera blauw, berde y cora), vloernan cu marmol (marmer), e azulehonan di mas bunita, of otro material moderno, bañonan grandi cu un baño di spa apart, balconnan completamente ekipa (“ingericht”) cu e mobilario di pafor di mas bunita, PLUS cu un asina yama “sky pool” (piscina, parti di e balcon, cu ta parce manera e ta “zweef”), aparatonan di television smart, aparatonan tablets, sistemanan di entretenimento pa musica y pelicula segun e gusto individual, suitenan “swim-up” (cu acceso via rio cu e piscina), restaurant-nan cu ta ofrece experiencianan culinario fascinante, y cushinanan “fusion” (cushinanan cu ta mescla diferente manera di preparacion cu otro, p. e. e cushina Frances cu e cushina Hapones/Chines) cu nan chief-cooknan di calidad Celebrity y Star, marinanan (facilidad di mara yatenan na pier) y yacht clubnan, e miho spanan, camanan y sobre-camanan y lakennan di un calidad supremo, piscinanan gigantesco, servicio di butler, y areanan di recepcion (“lobby”) cu a bira centronan di entretenimento.

E ideanan tras di diseñonan di hotelnan, nobo y moderno, ta fascinante, pero aki na Aruba ainda nos a keda sinta cu un producto hotelero totalmente anticua di siglo pasa, mientras cu tur rond di nos e hotelnan di mas fantastico y fabuloso ta wordo construi…ainda bo ta haya straño y inexplicabel cu Aruba ta keda leu atras pa motibo di un serie di hotelnan desecha y di categoria dos of tres? Wel, ami si no!!!

 

UN POTRET TA PAPIA MAS CU MIL PALABRA!

Bisando esey, lagami mustra nos lectornan algun ehempel di magno inversionnan nobo den area di Caribe…y tur esaki ta sosode bao di nos nanishi…y no ta capta atencion di nos ilustr’e Ministernan, sea cu nan ta carga nomber di Mike Eman, di Otmar Oduber, of di Mike de Meza; sea nan no sa di e situacion aki, of – pio ainda – no ta importanan un bledo, y no ta interesanan…y nan no tin y no ta tuma tempo pa esaki tampoco!…e propio interesnan y e propio saco tin prioridad, ta pa esaki so nan lo tin tempo!

Permitimi reproduci potret- y descripcionnan di inversionnan nobo cerca nos competidornan, manera esakinan a wordo presenta dor di e partidonan envolvi, manteniendo tambe e idioma Ingles pa no riska perde ningun particularidad di e proyectonan.

Top