Remigio Wever: E sesonan nobo di “e Forsa Nobo POR”, Joselin Croes, of tambe “Spuit 11”, ta mete den nos Turismo

INTRODUCCION

Permitimi prome duna un aclaracion di e “Spuit 11”: diccionario “van Dale” ta describi esaki como e denominacion pa un persona kende ta bini cu noticia bieu cu ya no tin ningun balor mas, of cu a wordo proba di ta incorecto, y unda e persona en cuestion no tin motibo ni derecho di papia mas.

Van Dale ta añadi: “Spuit elf geeft ook nog modder”, locual no mester di mas splicacion.

E denominacion “Spuit 11” den e caso aki ta referi na e persona di sra. Joselin Croes, kende no kier keda afo, y pues den su presentacion tambe kier bisa algo, aunke e no por wordo tuma mucho na serio pasobra – manera e descripcion di “van Dale” pa e “Spuit 11” ya ta indica – e ta trece algo dilante cu ta conoci hopi tempo caba, pues sra. Joycelin Croes ta hopi laat; mester admiti si cu sra. Croes ta touch un berdad evidente y logico, pero cu lamentablemente ya pa 8 aña largo NO a ser atendi dor di su lider nobo Otmar Oduber.

 

COMENTARIO 1.

Manera nos a comprende, sra. Joselin Croes, kende ta un di esunnan cu tambe a cay den e trampa di Otmar Oduber, ta ocupando su mes cu un asina yama “focusgroep” di estudiantenan di Universidad di Aruba.

Relaciona cu esaki, sra. Croes a mira e necesidad pa, den un entrevista, informa nos comunidad cu ta e calidad di nos turismo ta esun cu mester subi, y NO e cantidad.

Tabata exactamente su mesun lider nobo, e “Lider Maximo” Otmar, kende a laga e calidad di turismo pa Aruba na filingrana, y a duna cantidad mas importancia cu calidad.

Esaki ta splica e numeroso biaheronan for di Venezuela kendenan a ser atrai pa aki bin swipe na e diferente ATM-nan, y kendenan a uza e fonteinnan nobo den Caya Betico Croes pa tuma nan baño, pa di e manera ey e “Lider Maximo” por bin broma cu tabata bao di SU maneho cu Aruba por a atrae 1 miyon turista.

 

Tabata su “Lider Maximo” kende a admiti e organisacion di RIU – e cadena di All-Inclusive mas barata (“cheap budget”) na mundo! – como operador nobo den e hotel di Aruba Hotel Enterprises tempo cu Westin a bula pipa; tabata tambe su Lider Maximo kende tabata kier a permiti Bahia Principe – pa colmo un otro operador All-Inclusive “budget”, pues barata – daña y infecta San Nicolas cu cantidadnan grandi di turistanan cheap, turistanan “budget”.

Pero awor ta net un “SPUIT 11”, sra. Joselin Croes, cu ta bin siña nos con SI cos mester bay!?

Joselin, prome bo yega cerca nos cu bo sabidurianan, conta esakinan prome na bo Lider Maximo, kende a caba cu tur calidad di nos turismo, y kende a haci su maximo esfuerso pa pone cantidad prome cu calidad.

 

COMENTARIO 2.

Sra. Joselin awor kier bin siña nos tambe cu e calidad di servicio den e sector hospitalario mester mehora, y cu servicio y amabilidad riba Aruba a deteriora asina hopi?

Joselin, please bay bisa Otmar Oduber y su Gobierno esey; no ta nan, hunto cu e Gobierno di AVP, ta esunnan cu a terorisa nos hendenan di tal manera cu hende di berdad no sa mas CON pa pone un sonrisa di amigo riba nan cara?!

 

COMENTARIO 3.

On top di esey “Spuit 11” ta bin conta nos cu Aruba mester di un otro tipo di turismo.

Ay no, Joselyn, manera mi a yega di bisa caba, ta existi mas di 45 diferente tipo di hotel, y mas di 40 diferente “niches” di turista, y ta solamente MASTER-PLANNING DOOR DI EXPERTONAN lo por scapa nos di e consecuencianan di e maneho riba tereno turistico dor di bo lider maximo Otmar durante e ultimo 8 añanan, un maneho desgracia, poco profesional, reactivo y ad-hoc.

E, BO Lider Maximo nunca ainda a haci algo na “masterplanning”, ni na desaroyo di “niche”-nan nobo of na posicionamento di hotelnan, ni na ampliacion of expansion di e oferta di diferente tipo di hotel.

 

(Aki un splicacion di e terminologia “niche” ta na su lugar:

Den industria di turismo, antes – na principio – hotelnan tabata djis busca nan clientenan bao di famianan, turistanan comun y coriente, y comerciantenan, pa yena nan cambernan; pues tabata trata di gruponan general y amplio cu ta forma parti di un comunidad.

Awendia e departamento “Sales & Marketing” di un hotel (of di un cadena) ta traha mas dirigí, locual kiermen cu e hotel, of e cadena, ta dirigi su mes riba un of mas grupo special den e comunidad (“target group/audience”= “doelgroep”). P. e. e hotel por a bay specialisa su mes riba servicio di spa, acomodando asina ey e cliente cu lo tabata kier a drenta un spa tur dia.

Asina tambe e hotel por a opta pa fungi como un “adults-only” accommodation, satisfaciendo di e manera ey deseonan di turistanan cu no tabata kier tin e boroto di mucha rond di nan; of un “singles-only”-hotel unda lo bo NO haya parehanan of famianan.  

Na Inglatera bo ta haya hopi hotel cu ta completamente dirigi riba temanan for di e mundo di football; asina tambe bo ta haya “Hard Rock” cu ta specialisa nan mes riba clientenan cu ta gusta rock & roll, etc.

Lo bo a comprende awor cu “niche”-marketing ta encera un specialisacion hopi profundo y exigente, pero cu lo tin su recompensa tambe.)

 

COMENTARIO 4.

Sra. Joselin Croes kier desaroya turismo pa San Nicolas, y atrobe Joselin ta manifesta su mes como un “Spuit 11”.

 

Pakico?

Wel, pasobra pa hopi aña caba esey a wordo bisa na AVP, pues tambe na bo Lider Maximo Otmar Oduber; pero Mike Eman a todo costo tabata kier un refineria, cu – aunke aki aya mi ta haya comentario cu su apertura ta keda dudoso – si e habri mes, den mi opinion lo ta bao di condicionnan cu lo no cumbini Aruba, ni pa loke ta trata e cuponan di trabao cu e apertura lo mester nifica pa nos mercado di trabou, ni pa loke ta trata e entrada pa pais Aruba.

Lagami splica, y ohala mi ta kiboka: asina leu cu mi ta comprende NO tin financiamento pa e refineria, y mi ta duda cu esey lo yega at all.

 

Pakico?

Venezuela NO tin e fondonan;

Venezuela NO tin un moneda internacional di pago manera e dollar;

Venezuela ya a usa e fondonan – cu nan a presta a base di e contract cu pais Aruba – pa e reparacionnan di nan mesun refinerianan descuida y malcuida.

Mi no por hala un banda e impresion cu den mi opinion Mike Eman ta uzando e refineria pa pone entradanan hopi halto den e presupuesto pa aña 2017, entradanan cu mi ta kere NUNCA lo ser realisa, of cu en todo caso lo no ta di e magnitud manera hende lo por kere!

 

Di otro banda bo Lider Maximo kier pa den Colony bin e cadena All-Inclusive mas barata, “budget”, esta Bahia Principe; pues den bo categoria di “Spuit 11”, no bin bende tur sorto di nonsense tocante turismo na San Nicolas, pasobra boso partner den coalicion Mike Eman/AVP no ta desea esey toch!

E unico intencion tras di e nonsense di “Spuit 11” ta pa engaña (“misleid”) hendenan di San Nicolas kendenan posibelmente ainda no a capta y comprende cu AVP y POR ta e mesun grupo di soñadornan (creadornan di fantasia; “fantast”-nan), farsantenan (“mooiprater”-nan) y mentirosonan enfermiso.

 

COMENTARIO 5.

Y awor cos a bira mas ridiculo!

Sra. Joselin awor ta bin conta nos cu “E Forsa Nobo POR” a priminti di lo traha “bottom-up”.

(Lagami splica: den sector priva gerentenan/managernan no ta dicta mas; al contrario nan ta stimula participacion – “inspraak” – di e trahadornan cu ta yuda pensa riba proceduranan, etc.

Pues procesonan ta ser diseña cu total participacion di e trahadornan (“bottom-up”), pa despues wordo aproba dor di gerencia (“top-down”).

Esun cu ta pensa “un poco malo”, lo duna un otro splicacion na e expresion “bottom-up”.)

 

Cos di hari! Con bo kier pa Otmar Oduber y Mike Eman bay traha “BOTTOM-UP”!

Esaki si ta un ridicules di sra. Joselin, Spuit 11!

E Lider Maximo Otmar Oduber tabata pa 8 aña largo e dictador den turismo; e SO mester tabata esun pa dicidi cua hotel mag a bende – of no – paketenan All-Inclusive; e SO mester por a dicidi ta ken – y ken no – lo por a haya un permiso pa taxi; e SO mester por a dicidi kico mester a sosode cu e placa di ATA, y con esaki a wordo uza pa e cosnan robes; e SO mester por a dicidi con Aruba mester a wordo mercadea, y e SO a dicidi cu AHATA no tabatin absolutamente nada di bisa! P’esey tambe nunca AHATA tabatin ningun voto of palabra (“inspraak”; participacion den tuma decision), y awor e Lider Maximo Otmar Oduber ta bin conta nos cu awor e ta bay traha “BOTTOM-UP”!!??!!??

Bruhamento di palabra prome cu, y en bista di, e proximo eleccion na september!

 

Y dj’ey Mike Eman…BOTTOM-UP???

Mike Eman BOTTOM-UP, sigur esey lo ta pa algo completamente diferente cu “inspraak”! Pasobra Mike – kende, como un berdadero dictador pa añanan largo, ta ser compara cu Adolf Hitler – nunca lo permiti “inspraak”. Di participacion e lo no a tende nunca, pues si ta papia di “BOTTOM-UP”, esey lo sosode pa algo completamente diferente!

Bo ta keda invita pa keda pendiente! No perd’e!

Top