Renaissance Aruba ta apunta director di F&B nobo y ta lansa Fresco Restaurant

Recientemente Renaissance Aruba a anuncia cu e ta apunta un director nobo pa su F&B, Diego Lemasson. E anuncio aki a bay man den man cu e relansamento di e resort su restaurant Fresco, cu awor oficialmente a keda habri como un restaurant Italiano. E concepto y standard di Renaissance no ta desconoci pa Diego, ya cu anteriormente e tabata den servicio di Renaissance Santo Domingo, na unda e’la guia e programa F&B di e resort desde su apertura na Juni 2015.

 

Diego Lemasson a ricibi su MBA den maneho di hospitalidad y turismo na Ecole Superieure Internationale de Savignac na Francia, y a cuminsa su carera como supervisor di F&B na Lace Market Hotel, Nottingham na Inglatera. For di eynan, e’la desaroya y tabata tin un envolvimento importante den diferente programanan culinario di diferente hotel y resort den shete diferente pais na Europa, Sur America y Caribe. Cu mas di 10 aña di experencia trahando pa Marriott International, Diego ta añadi hopi talento y liderazgo na Renaissance Aruba su programa di gastronomia re-diseña.

 

“E resort a bin ta inverti hopi den actualisacion di su programa di F&B durante di e ultimo aña, y Fresco ta un ehempel recien di e calidad di servicio y gastronomia cu nos ta ofrece,” esaki di acuerdo cu Diego. “Mi ta hopi entusiasma pa join e team masha talentoso aki mientras hunto nos ta hiba nos huespednan na un experiencia gastronomico eleva.”

 

Fresco awor recientemente re-diseña, lo ofrece huespednan un cushina Italiano tradicional, cu un menu a la carte di pizza, pasta, pastries y desserts Italiano. Riba e menu lo por disfruta di p.e un prosciutto di parma, lobster risotto y un Bailey’s tiramisu. Fresco lo ofrece e miho beverage program na Aruba y ta sirbi unicamente e calidad di mas halto di cocktail y biña Italiano, incluyendo clasiconan manera Amaretto Sours, y Negronis. E restaurant ta sirbi sampling di diferente limonada traha den cas mes, manera un limoncello, mandarinecello y limecello. Fresco ta figura un espacio aire liber pa cena, cu un open kitchen y un forno tradicional di klinker pa traha pizza. Nan ta habri pa desayuno, lunch y dinner, e espacio den aire liber lo permiti huespednan disfruta plenamente di un panorama di anochi mientras nan ta disfruta di nan cena al fresco cu tambe ta parti di Renaissance Aruba su opcion all-inclusive.

 

E restaurant completamente renoba ta complementa Renaissance Aruba su otro 6 localidadnan F&B, entre nan esun recientemente renoba na Juni 2017, L.G Smith’s Steak & Chop House. Pa mas informacion y update di e restaurant bishita  http://www.facebook.com/FrescoAruba

Leave a Reply

Top