Renaissance Aruba ta invitabo pa e di 3 edicion di competencia di bartender

Renaissance Aruba proximamente lo ta anfitrion di e tercer edicion di Bartenders’ Brawl. P’e ultimo dos añanan e competencia entre e bartendernan participante ta tenaz; e unico cos ‘dushi’ t’e cocktailnan cu invitado y publico lo disfruta durante di e competencia, tur otro cos lo ta den competencia fuerte. Ocho (8) di Aruba su bartendernan cu mas curashi lo enfrenta otro na Renaissance Ocean Suites Beach, dilanti di un publico grandi pa demostra nan superioridad den mixologia.

Diasabra dia 14 di october proximo, e bartendernan participante representando Pepia Est., Aruba Trading Company, Arion Wine Company, Tropical Bottling, Playa Liqour, La Cava, Divino y Manrique Capriles lo traha un mescla original cu meta pa bira e bartender mas cotiza na Aruba.
Invitadonan n’e evento lo vota p’e cocktail ganador- esun mas trendy, mas creativo y mas dushi lo gana e di 3 titulo di Bartenders’ Brawl y mesora bira e Iron Bartender.

E aña aki lo agrega hurado profecional n’e competencia, nan ta A.J Tromp, Ashely Tromp, Jairo Boekhoudt y Tina Bislick.
Esaki ta haci cu lo tin 2 premio; un premio p’e bartender mas popular y e otro p’esun cu wordo scogi dor di e huradonan profecional.
Durante di e competencia publico lo disfruta di presentacion di Cesar Diaz celebrity bartender, cu lo ta invitado e aña aki.

Tocante Cesar Diaz, Celebrity Bartender:
Originalmente for di Venezuela, Cesar Diaz su historia y pais natal ta duna su mixologia un accent special, y esaki na hopi ocasion tabata yabi pa un cocktail sobresaliente. Na 2011, Cesar a funda Cocktail Capital, un compania cu ta duna asesoria na otro companianan pa crea impacto den mercado y desaroya programanan special pa bar.

Despues di a biba na Miami el a muda pa St. Augustine na unda el a yuda habri The Ice Plant, y despues di algun aña e oportunidad a presenta pa habri su mesun bar, Odd Birds Bar, cu a sa di crea un nomber di peso na noord Florida.
Despues di apenas 8 luna, e ta habri su di dos bar Damiana Elixirs and Love Potions, cu enfoke riba bebidanan Agave primordialmente.

Awendia, Cesar ta celebra e apertura di su tercer concepto, Milagro on 12th, un restaurant cu cushina Latino y un full bar cu recientemente a conoce envolvimento di Chef internacionalmente renombra, Chef John Herrera.
Cesar a bin ta crea cocktail di diferente sabor- for di esunnan clasico te esun mas trendy y e mesclanan mas futuristico cu bo por imagina.

Renaissance Aruba, anfitrion di e Bartenders’ Brawl 2017, ta invitabo pa cumpra bo carchi na Starbucks, Paseo Herencia, Renaissance Mall, Renaissance Marketplace y tambe na lobby di Renaissance Aruba.
Cada carchi di entrada tin un balor di $55 cu ta inclui 8 cocktail y ‘bites’.
Lo tin un cash bar pa tur cu ta desea di cumpra mas cocktail den transcurso di e anochi. Pa mas informacion bishita e pagina di facebook di Renaissance Aruba Resort & Casino.

Leave a Reply

Top