Rene Herde’ (AVP): BERGUENSA!

“Relaciona cu e desicion di Ministerio Publico pa pidi 3 aña y mey pa un abusador sexual cu a wordo gara sunu den auto cu un mucha menor di edad, e lider di MEP a haya bon pa ataca partido AVP riba esaki en bes di yuda busca un solucion real pa e dolor aki!

 

E ta un BERGUENSA cu e lider di oposicion no ta uza su conocemento di ley pa papia berdad den e asunto aki. Ta un BERGUENSA cu e lider di oposicion ta purba pone e culpa na e luga robes y sconde e hecho cu e ta papia so sin actua!

E ta un BERGUENSA y un comportacion iresponsabel pa un hende cu sa miho, ta actua asina insincero. Ni pa bentaha politico un “lider politico” ta bruha tera di e forma aki.

Esta un BERGUENSA!”, asina Rene Herde’ a expresa.

 

HECHONAN

“E hechonan ta contradeci atrobe completamente loke e lider di MEP ta bolbe haci. E hechonan ta cu ta cu sosten di AVP den Parlamento cu a hisa e castigo pa crimennan di abuso sexual contra menos di edad na 8 aña. Den caso cu tin circunstancianan cu ta pisa mas, e castigo por bay hasta te 16 aña.

 

Den e caso specifico cu ta den discusion awor aki, tin tur preuba cu por tin mester. E violador a wordo gara na momento di e acto. Contrario cu den otro casonan, den e caso aki no tin falta di prueba. E circunstancianan pa aumenta e castigo ariba 8 aña tambe t’ey.

P’esey ta straña nos di AVP cu Ministerio Publico a pidi asina poco pa e castigo.

Ministerio Publico a pidi menos cu mita di e castigo cu por a wordo duna, anto sin conta e motibonan pa aumenta e castigo pa 16 aña!”, Herde’ ta splica.

 

“Hecho ta cu AVP Parlamento a haci e trabou di aumenta e castigo hopi mas halto cu loke Corte sa duna! Hecho ta cu AVP ta di acuerdo cu e sentimiento di husticia di pueblo den e casonan aki pa pidi pa e castigonan hopi mas halto. E daño cu ta causa na e victimanan ta keda cu nan pa resto di nan bida. E violador ta sali liber den un par di aña. Hecho ta cu Ministerio Publico y Corte ta sigui tuma decisionnan cu ta hopi diferente cu loke e “sentimiento di husticia” den comunidad ta demanda. Hecho ta cu e mes un situacion aki tin na Hulanda.

 

Eynan tambe comunidad ta cuestiona e desicionnan di Ministerio Publico y Corte. Kiermen cu esaki no ta un asunto netamente Arubiano! Hecho ta cu e lider di MEP sa tur esaki.

Pero apesar di sa cu e problema no ta cerca Parlamento of Gobierno, pero cerca Ministerio Publico y Corte, toch e lider di MEP ta scoge conscientemente pa bruha tera y crea un impresion totalmente robes. E ta haci esey pa purba saca probecho politico for di un asunto asina delicado y doloroso. Esey ta un BERGUENSA!”, Herde’ a mustra.

 

PUNTO DI BISTA DI AVP

“Fraccion di AVP den Parlamento for di aña 2010 a scucha famia di victimanan, a scucha organisacionnan cu ta boga pa husticia y pa proteccion di muchanan.

Fraccion di AVP a cambia e ley y a aumenta e castigonan. Fraccion di AVP ta desaproba atrobe e hecho cu Ministerio Publico y Corte di Husticia ta interpreta ley y e hechonan den casonan di abuso sexual di tal forma, cu semper e castigonan ta hopi mas abou cu loke ley ta permiti of cu loke pueblo ta spera di nan como acto di husticia.

 

AVP y pueblo no ta pidi pa vengansa! Nos ta pidi pa husticia! Nos ta pidi Ministerio Publico y Corte pa sikiera splica nos y pueblo con nan ta yega na pidi y duna castigonan asina ley di loke ley ta permiti. Nos ta pidi pa Ministerio Publico y Corte splica nos y Pueblo ta dicon e castigonan cu ta pidi y duna ta asina leu di loke nos sentido di husticia ta spera.

 

Na e lider di MEP, cu ni sikiera a presenta e concepto di ley cu el a priminti pa trata den Parlamento pero awe atrobe ta purba crea un impresion totalmente robea. E no kier contribui na un solucion.

E djis kier saca probecho politico! Hasta den algo asina sensitivo. Esta un BERGUENSA!”, asina Rene Herde’ a duna di conoce.

Top